Тохсунньу 21 күнүгэр Ходоро нэһилиэгэр биир дьоро күн үүннэ. Нэһилиэк дьаһалтата бу күн саҥа хонтуораланна. 12х18 кв.миэтэрэ иэннээх аныгы матырыйаалынан олохтоохтор күүстэринэн тутуллубут дьиэ ситэн-хотон үлэҕэ киирэр үөрүүлээх тэрээһинигэр Мэҥэ Хаҥалас улууһун баһылыга Дмитрий Тихонов, улуус дьокутааттарын сэбиэтин бэрэссэдээтэлэ Иннокентий Андросов, нэһилиэктэр баһылыктара эҕэрдэлии кэлбиттэр.
Үөрүүлээх тэрээһин бөдөҥ судаарыстыбаннай уонна уопсастыбаннай диэйэтэл, СӨ норуотун хаһаайыстыбатын үтүөлээх үлэһитэ, Мэҥэ Хаҥалас улууһун бочуоттаах гражданина Василий Васильевич Скрябин төрөөбүтэ 81 сылынан кини аатын сүгэр оскуола иннигэр турар бүүһүгэр дойдубут өрөгөй ырыатынан саҕаланна.
Улуус баһылыга Дмитрий Тихонов бу күн суолтатын бэлиэтээн:
- Бүгүн биһиги улууспутуттан үүнэн тахсыбыт улахан салайааччыбытыгар сүгүрүйэр күммүт. Орто дойдуга төһө да кылгас кэмҥэ олорон аастар, Василий Васильевич Скрябин саҕалаабыт уонна ыыппыт үлэтэ бар дьоҥҥо күн бүгүн үлэлии турар. Ону биһиги хаһан да умнубаппыт. Ыччаттарбытын кини холобуругар иитэр ытык иэспит буолар. Холобурга эттэххэ, “Басхан” диэн биир улахан өрөспүүбүлүкэ үрдүнэн ыытыллар тэрээһин биһиги улууспутугар кини аатынан ыытыллар. Манна бастыҥ ыччаттар кыттаннар, инники хардыыларыгар кынат анньыналлар.
Биһиги бэйэлэрин кэмнэригэр үлэлээн-хамсаан ааспыт бастыҥ салайааччылабытын хаһан да умнуохпут суоҕа уонна кинилэр ааттарын куруутун үрдүктүк тутаммыт сирдьит сулус оҥостуохпут, — диэтэ.
Маны сэргэ, Ходоро нэһилиэгин баһылыга Виктор Федоров, В.В.Скрябин аатынан орто оскуола боропсойууһун бэрэссэдээтэлэ Мария Кылабысова ахтан-санаан тыл эттилэр. Кэлбит дьон сүгүрүйүү бэлиэтинэн кини сырдык аатын үйэтитэр бүүскэ тыыннаах сибэкки дьөрбөтүн уурдулар.
Бу кэннэ салайааччылар, ыалдьыттар саҥа дьиэ үөрүүлээх аһыллыытыгар көһөн таҕыстыбыт. Саха дьонун сиэринэн түсчүт Зиновий Игнатьев аал уотун оттон, арыылаах алаадьынан айах тутан алгыс маанытын көтөхтө. Нэһилиэк баһылыга Виктор Федоров кылгас кэм иһигэр дьонун-сэргэтин түмэ тардан, сатабыллаахтык былааннаан, билиҥҥи уустук кэмҥэ бэйэ күүһүнэн саҥа эбийиэги тутан олоххо киллэрбитэ дьонугар-сэргэтигэр бастыҥ холобур буолла. Кини бу иннинэ үлэлээн олорбут элбэх хайысхалаах кииннэрэ 2023 сыл сэтинньи бүтүүтэ хаарбах туруктааҕынан билиниллэн сабыллыбытын, кулууптара балаҕаҥҥа көспүтүн, олохтоох дьаһалта уонна бибилэтиэкэ 5х5 кв. миэтэрэ иэннээх дьиэҕэ кыбыллан үлэлии олорбуттарын кэпсээтэ. Кыһалҕаттан хайдах тахсары толкуйдааннар, 12 мөлүйүөн солкуобай суумалаах смета оҥорторбуттарын, олохтоохтор уонна доҕотторун күүстэринэн дьаһалта саҥа дьиэтин 5 мөлүйүөнтэн тахса суумаҕа тутан киллэрбиттэрин сырдатта. Улахан экрааҥҥа тутуу хайдах барбытын хаамыытын киинэ оҥорбуттарын көрдөрдүлэр.
Улуус баһылыга Дмитрий Тихонов эҕэрдэлээн туран улууспут сайдыытыгар быһаарыныы ылынар биир тирэх дьиэ буоллун диэн алгыһын тиэртэ итиэннэ улуус уонна нэһилиэк сайдыытыгар кылаатын иһин Ходоро нэһилиэгин баһылыгар Виктор Федоровка улуус дьаһалтатын аатыттан Эҕэрдэ суругу кытта харчынан туоһу суругу үөрүүлээх быһыыга-майгыга туттарда. Бу күн олохтоох дьаһалта дьиэтин тутуутугар үлэлэспит, күүс-көмө буолбут прораб Николай Дмитриев, тутааччылар Егор Федоров, Терентий Павлов, сыбааркаһыттар Илья Нестеров, Василий Павлов, тыраахтардаах Егор Скрябин улуус баһылыгын Махтал суругунан наҕараадаланнылар.
Нэһилиэк баһылыгын Махтал суругунан Игнатий Скрябин, Гаврил Максимов, Өркөн Осипов, Денис Чиряев, Сергей Скрябин, Иван Алексеев, Афанасий Петров, улахан тиэхиньикэлээх суоппардар Владислав Дмитриев, Владимир Дмитриев, Александр Дмитриев, урбаанньыт Ян Новгородов бэлиэтэннилэр. Маны таһынан нэһилиэк баһылыга Виктор Егорович Майа сэлиэнньэтин баһылыгар Алексей Неустроевка мэлдьи күүс-көмө, өйөбүл буоларыгар махталын биллэрдэ. Салгыы нэһилиэктэр баһылыктара, Ходоро нэһилиэгин тэрилтэлэрин салайааччылара, бэтэрээннэрин сэбиэтин бэрэссэдээтэлэ Евдокия Исакова эҕэрдэлээтилэр, туоһу суруктары, сэмэй бэлэхтэри туттардылар. Бу курдук олус истиҥ, сылаас эйгэ олохтонно. Олохтоохтор баай астаах фуршет тэрийэн ыалдьыттарын күндүлээтилэр. Саҥа дьиэ малааһыныгар Алена Васильева үҥкүүтүнэн, Николай Васильев-Айтамыл, Спиридон Григорьев, Степан Копырин ырыаларынан-тойуктарынан эҕэрдэлээтилэр, Степан Осипов байаанынан доҕуһуоллаата.
Норуот күүһүнэн тутуллубут саҥа дьиэ олохтоохторго көмөлөөх, кыһалҕалаах боппуруостарын быһаарсар үйэлээх тутуу буоллун. Ходоролор үтүө холобурдара батыһааччылардаах буоллун.
Марелла Баишева.