Чыамайыкыга биир дойдулаах ыччаппыт «Утум салҕаныыта ‒ оҕо» испэктээги туруорда

Нэһилиэкпитигэр Чыамайыкыга олунньу 14 күнүгэр Тапталлаахтар күннэригэр ананар Аграфена Дмитриевна Макарова аатынан Дьокуускайдааҕы култуура уонна ускуустуба коллеһын төрүт култуура салаатын 4 кууруһун устудьуона Иванова Вераника «Утум салҕаныыта оҕо» диэн  дипломнай туруоруутун көрдүбүт.  Испэктээкил кыайан оҕоломмот эдэр ыал туһунан буолар. Эдэр ыал  оҕо кутун биэрэр ойуун баарын истэн, киниттэн көрдөһө бараллар. Ойуун кинилэргэ көмөлөһөр, уонна биир сылынан уол оҕо төрүө диэн алҕыыр.
Эдэр ийэ оруолун Вераника бэйэтэ оонньообута, эдэр аҕаны 11 кылаас үөрэнээччитэ Куприянов Андрей, ойууну Дьячковскай Эдгар Афанасьевич, ойуун кутуруксутун 10 кылаас үөрэнээччитэ Михаил Николаев, эдэр ийэ төрөппүттэрин Иванова Надежда Владимировна уонна Романов Анатолий Анатольевич, оһуохайдьыты Созонова Александра Петровна оонньоотулар. Театр «Саха Kids» оҕолоро испэктээкили уһуларга, уотун холбуурга көмөлөстүлэр уонна массовкаҕа оонньоотулар.
Испэктээкэли дьон бары сэргээтилэр, хайҕаатылар. Уонна санааларын эттилэр:
Дьячковская Аграфена Константиновна: «Олус үчүгэй! Артыыстар бары бэркэ оонньоотулар, оруолларын бары арыйдылар. Ойуун эдэр ыалга оҕо кутун биэрбитэ наһаа үчүгэйдик көһүннэ. Вераника эдэр ийэ хомолтотун көрдөрбүтүгэр, дьиҥнээхтии курдук этэ. Мин бэйэм ону көрөн хараастан ыллым. Уонна бу быйыл театр куруһуога баар буолан, оҕолорбут оруолга сөп түбэһиннэрэн, наһаа үчүгэйдик оонньуур буолбуттар. Вераникаҕа дипломнай үлэтигэр ситиһиилэри, үөрэҕин бүтэрэн үчүгэй култуура үлэһитэ буоллун диэн баҕа санаабын тиэрдэбин».

Захаров Антон 10 кылаас үөрэнээччитэ: «Бары наһаа үчүгэйдик оонньоотулар. Вераника Афанасьевна ытаабытыгар бэйэм эмиэ уйадыйан ыллым.
Декорациялара, уоттара барыта үчүгэй. Мин олус сөбүлээтим».

Иванова Надежда Владимировна (ийэ оруолун толорбута): «Бу испэктээкил билигин да олоххо баар проблеманы таарыйар. Урут даҕаны, билигин даҕаны маннык кыһалҕалаах ыаллар бааллар. Оҕо — итэҕэл өттүттэн таҥара бэлэҕэ диэн өйдөбүл. Ийэни оонньуурбар улахан ыарахаттары көрүспэтэҕим, ол гынан баран оҕом кыайан оҕоломмотун, сиэнэ суоҕум туругун көрдөрөрбөр ыарахан этэ».

Вераника бэйэтэ Чыамайыкыттан төрүттээх. Манна кэлэн оскуола оҕолорун ырыаҕа-тойукка, артыыстааһыҥҥа үөрэттэ. Биһиэхэ улахан опыт биэрбитигэр махтанабыт уонна ситиһиилэри баҕарабыт.

Копырина Азиза. 10 кылаас. Чыамайыкы