Чыамайыкыга оскуолаҕа каадыр боппуруоһа сытыытык турарын эттилэр

Олунньу 13 күнүгэр отчуоттуур иккис бөлөх Чыамайыкы нэһилиэктэгэр үлэлээтэ.

Александр Захаров баһылыктаах Даркылаах нэһилиэгэр 70 киһи мустан үс чаас кэриҥэ мунньахтаатылар.

Ыйытыыларга бастатан туран куйаар ситимигэр киэҥник тарҕаммыт алмаас көстүүтүн туһунан сурахтар буоллулар. Бөлөх салайааччыта Михаил Кириллин дьоҥҥо тиийэр гына боппуруоһу быһааран биэрдэ. Трубкалар 100 м дириҥҥэ сыталлара чуолкайдаммыт, төһө саппаастааҕын, хайдах хостуохха сөбүн үөрэтии-чинчийии үлэтэ ыытыллар. Геологическай чинчийиилэр уонунан сыллар барыахтарын сөп эбит. Сибилигин ким да кэлэн хаһан, урусхаллаан барыа суоҕа диэн олохтоохтору уоскутта. Олохтоору бултуур сирдэрэ долгутар. Тамма ураты харыстанар сир тэпсилгэн буолбутун ыйдылар. «Саха булт» элбэх лиссиэнсийэни ылан баран атыылыыра иһилиннэ. Лиссиэнсийэ сыаната ыарахан буолан олохтоох булчуттар кыайан атыыласпаттар эбит. Еремей Никитин хотон өрөмүөнүгэр туох көмө баарын, «Суһал көмө» массыыната хаһан көрүллэрин, сайыҥҥы суолу көннөрүүнү ыйыталаста. Оксана Куприянова уопсай хотон наадатын ынах сүөһү эстэн эрэрин эттэ, бырамыысыланнас сайдарын күүппэккэ олохпутун сайыннаран бэлэмнээх буолуоҕуҥ диэн ыҥырда.

Антонина Филиппова каадыр боппуруоһа сытыытык турарын, оскуолаҕа нуучча тылын учуутала суох, эксээмэн туттараары тэйиччиттэн үөрэнэллэрин эттэ. Үлэһиттэр олорор уопсай дьиэлэригэр хапытаалынай өрөмүөн оҥоһулларыгар көмөлөһөллөрүгэр көрдөстө.

Елизавета Неустроева.