Олунньу Чыамайыкы нэһилиэгэр олус сэргэхтик ааста. Аҕаларга уонна уолаттарга анаан «Эр Хоһуун» бырайыак тэрээһиннэрин билиһиннэриэхпит.
Бырайыак ааптардара: уһуйаан иитээччитэ Нарыйа Константиновна Илларионова, дириэктэри оскуола иннинээҕи үөрэхтээһиҥҥэ солбуйааччы Юлия Петровна Иванова, оскуола дириэктэрэ Любовь Евгеньевна Романова санааларын үллэстэллэр: «Быйылгы үөрэх дьылыгар уһуйаан, оскуола, нэһилиэк үлэтин ситимниир санааттан «Эр Хоһуун» социальнай барйыагы суруйбуппут. Бырайыакка нэһилиэкпит эр дьоно, уһуйаан саастарыттан саҕалаан, оскуолаҕа үөрэнэр уолаттар, ыччаттар хабыллаллар. Бырайыак сүрүн сыала: Уол оҕону эр киһилии иитии, төрүт дьарыкка сыһыарыы, эт-хаан өртүнэн сайыннарыы, дойдуга тапталы иҥэрии. Олунньуга улууска ыытыллыбыт патриотическай иитии ыйыгар сөп түбэһиннэрэн нэһилиэк таһымыгар сүрэхтээбиппит уонна олоххо киллэриэхтэрэ диэн эрэнэн туран Аҕа сүбэтигэр туттардыбыт».
Дириэктэри иитэр үлэҕэ солбуйааччы Аграфена Дьячковская:
‒ Биһиги нэһилиэккэ тыа хаһаайыстыбатынан утумнаахтык дьарыктанабыт. Эр дьон өбүгэлэрин үгэһин утумнаан булка сылдьаллара үгүс. Оҕону төрүт дьарыкка сыһыарыы оскуолабыт «Өбүгэ ыллыга» элбэх сыллаах бырайыагын биир хайысхата буолар. Ону кытта «Эр Хоһуун» бырайыак ситимнээхтик үлэлэрин саҕалаатылар. Ол курдук олунньу 5 күнүгэр оскуола үөрэнээччилэрэ, ыччаттар, нэһилиэк эр дьоно түмсэн «Аҕа дойдуну көмүскээччилэр» дэкээдэҕэ сөп түбэһиннэрэн сөптөөх былааны бигэргэтэн, аһаҕастык санаа атастаһан үлэ саҕаланна. Ол түмсүүгэ Аҕа сүбэтэ талылынна, салайааччынан Чыамайыкы нэһилиэгин баһылыга Александр Захаров буолла. Уол оҕону эр киһилии иитиигэ үлэлииргэ сөбүлэһэн ылыстылар. Бастакы тэрээһин оскуола оҕолоро уонна эр дьон хамаандата «ТОК» оонньууттан саҕаламмыта. Иккис ‒ Бойуот күөлгэ баран, сааскы куска бэлэмнэнэн дурда атаҕын туруорустулар; үһүскэ булчут Семен Уткин бөрөнү сүлэргэ көмөлөһүннэрдэ, элбэххэ үөрэттэ; төрдүс тэрээһиҥҥэ Григорий Федоров андаатары туулаан ыларга маастар-кылааһы биэрдэ. Оҕолор үөрүүлэрэ үгүс, инник эр дьону кытта сылдьан элбэххэ үөрэнэллэр, дьиҥ чахчы патриотическай тыыннаах буолан тахсыахтара диэн эрэнэбит.
Саҥа талыллыбыт аҕа сүбэтин салайааччыта Александр Захаров: «Эр хоһуун бырайыак биһиги нэһилиэккэ үлэлээн эрэрэ кэрэхсэбиллээх. Олунньу 5 күнүгэр патриотическай иитии дэкээдэтин чэрчитинэн оскуола оҕолоро, аҕалар, эр дьон, ыччаттар кыттыылаах нэһилиэк таһымыгар «Эр Хоһуун» бырайыак саҕаланна. Сүбэ мунньах, аһаҕас кэпсэтии буолбута. Үүнэн, улаатан эрэр ыччаттарбытын олоххо бэлэмнээх икки атахтарыгар бигэтик тирэнэн туралларыгар, аҕа, эр дьон, оҕолор алтыһыылара улахан суолталаах. Биһиги төрүт үгэспитин, култуурабытын көрдөрөбүт, билсиһиннэрэбит, бэйэбитинэн холобур буолабыт оҕону иитиигэ. Оҕо төһөнөн үлэҕэ, култуурабытыгар, үгэспитигэр чугас сыстар да, оччонон кини сахалыы толкуйа, олоҕу көрүүтэ, араас түгэннэргэ быһаарыныы ыларыгар бу барыта көмөлөөх, оҕолорбут инникигэ эрэллээх, булугас өйдөөх-санаалаах, бэйэлэрэ улаатан дьиэ кэргэн буолан, нэһилиэкпитигэр, улууспутугар, өрөспүүбүлүкэбитигэр туһалаах дьон буолан тахсалларыгар төһүү күүс буолуо диэн эрэлбит улахан. Ол курдук оҕолорбут номнуо Бойуот Эбэҕэ андылыыр дурда атахтарын туруорууга, бөрөнү гэ андаатары туулаан бултууру көрдүлэр, кытыннылар. Инникитин маннык хамсааһыны салгыы сайыннаран иһэр былааннаахпыт”.
Антон Дьячковский, 5 кылаас үөрэнээччитэ: “Биһиги Бойуот күөлгэ дурда атаҕын туруорууга аҕаларбытын кытта барса сылдьыбыппыт. Дурда көнө буоллун, саас андыга үчүгэйдик сытарга диэн тыраахтарынан аҕам сиэрдийэ соһон киллэрбитэ. Эр дьон ону быһан-отон, бэлэмнээн баран, дурда турар сиригэр ойбоннору алларан, сиэрдийэлэри туруору аспыттара. Олору аҕам тыраахтар куунунан ыбылы баттаппыта, дириҥник киирдин диэн буолла».
Антон Захаров, 10 кылаас үөрэнээччитэ: «Биһиги Уткин Семен Владимирович ыҥырыытынан уһаайбатыгар адьырҕа кыылы ‒ бөрөнү сүлүүгэ көмөлөспүппүт, көрбүппүт. Бөрө диэн олус интэриэһинэй кыыл эбит. Холобур, бөрө мээнэ сылдьар киһиэхэ түспэт. Ол туһунан Семен Владимирович сиһилии кэпсээбитэ. Ол кэпсиирин истэммин элбэҕи биллим-көрдүм. Бөрөнү сүлэргэ холонон көрдүм, үлэбин астынным. Бөрө этин сиэбэт буолан, булчуттар сүлэн баран төттөрү бултаммыт сиригэр таһааран быраҕаллар, ону бөрөлөр бэйэлэрэ харайаллар эбит. Саас, халлаан сылыйдаҕына булка миигин уонна уолаттары илдьэ барыах буолбута. Ол иһин саас буоларын астына-дуоһуйа кэтэһэ сылдьабыт».
Эрчим Куприянов, 7 кылаас үөрэнээччитэ: «Биир күн Чыамайыкы нэһилиэгин булчута Федоров Григорий Михайлович хайдах андаатары ойбонтон туулаан ыларын көрүҥ диэн биһигини Даркылаах күөлгэ ыҥырбыттара. Улахан кылаас уолаттара Андрейдаах Артур бастыкы ойбону тэспиттэригэр уу бадараннаах этэ, ону Григорий Михайлович хаарынан көмпүтэ, манан андаатар уйата суох эбит диэн. Иккис ойбону тэспиттэригэр ол бадараана суох этэ. Онно тууну укпута, талахтары уурбута уонна куулунан саппыта, хаарынан үрдүн баттаппыта. Барытын кэпсээн, көрдөрөн биэрбитэ. Сарсыныгар уолаттар мустан, туубутун көрө киирбиппит. Григорий Михайлович хас да сиргэ туулуур эбит. Бастакы ойбоҥҥо хомойуох иһин андаатар суох этэ, ол аата чугас эргин андаатар уйата суох эбит диэбитэ. Онтон иккис ойбоҥҥо түһэрбит туутугар көрбүппүт икки андаатар баар этэ. Инчэҕэй андаатары хаарга буккуйдахха тутатына кууран хааларын көрдөрбүтэ. Уопсайа түөрт андаатары ол күн туулартан туппуппут».
Антон Захаров, 10 кылаас, Эрчим Куприянов, 7 кылаас, “Проба пера” эдэр кэрэспэдьиэннэрэ.
Чыамайыкы
