Уһун өрөбүлгэ Москва куорат «Космос» улахан кэнсиэрдиир саалатыгар 25-с төгүлүн ыытыллыбыт «Ороһуоспа сулустара» Норуоттар икки ардыларынааҕы бэстибээл-куонкурус 30 дойдуттан кыттааччылары түмтэ, барыта 90-тан тахса бииртэн биир үчүгэй нүөмэр көрдөрүлүннэ.
Майатааҕы «Чуораанчык» оҕо саадын кэлэктиибэ уонна төрөппүттэрэ буолан бу күрэххэ баран 2 хайысханан кыттан, үрдүк ситиһиилэннилэр. Ирина Нестерева салайааччылаах бөлөх «Хоту дойду тыына» аныгылыы муоданы көрдөрөн 2-с миэстэ буолары ситистэ. Оттон Розалия Шарина салайар «Чуораанчык» үҥкүү ансаамбыла толоруута 1-кы миэстэнэн бэлиэтэннэ.
Бэлиэтээн эттэххэ, бу үҥкүүнү уһуйаан 30 сыллаах үбүлүөйүгэр анаан айбыттара-туппуттара. Быйыл оҕо тэрилтэтин 35 сылыгар анаан чочуллан, таҥаһа-саба саҥардыллан, Москва куоракка үрдүк ситиһиилэнэн кэллилэр.
Истиҥ эҕэрдэбитин уонна бары өйөөбүт дьоммутугар – кэлэктиипкэ, төрөппүттэргэ, оҕолорго улахан махталбытын тиэрдэбит!
«Чуораанчык» уһуйаан бэтэрээн үлэһиттэрэ.
