Саха сиригэр Физкултуурунай хамсааһын 100 сылыгар аналлаах физкултуура уонна успуорт үлэһиттэрин 3-с Сийиэһэ ахсынньы 13-15 күннэригэр Дьокуускай куоракка “Сэргэлээх уоттара” култуурунай кииҥҥэ ыытылла турар. Манна өрөспүүбүлүкэ араас муннуктарыттан 800-тэн тахса дэлэгээт кыттыыны ылар.
Сийиэскэ маассабай уонна оҕо успуордун сайыннарыы итиэннэ адаптивнай успуорду өйөөһүн, чөл олох тула киэҥник дьүүллэстилэр. Саха сирин нэһилиэнньэтин 55 %-на успуордунан дьарыктанарын бэлиэтээтилэр.
Сийиэс пленарнай мунньаҕар «Демография» национальнай бырайыак чэрчитинэн ыытыллыбыт «Чөл туруктаах нэһилиэк» бырайыак куонкуруһун түмүгүн таһаардылар. Тустаах бырайыакка Саха сирин 100 нэһилиэгэ кыттыбыт. Тыа сиригэр физическэй хамсааһыны сайыннарар уонна чөл олоҕу өйүүр сыаллаах бырайыакка кыттыбыт нэһилиэктэри кэтэхтэн көрүүгэ кыайыылаахтары 3 бөлөҕүнэн арааран сыаналаатылар. Сыллааҕы үлэ түмүгүнэн 9 кыайыылаах нэһилиэктэри наҕараадалаатылар. 1-кы бөлөххө Үөһээ Бүлүүттэн Хоро, Мэҥэ Хаҥаластан Төҥүлү итиэннэ Өлөөн улууһуттан Килбэн нэһилиэктэрэ кыайыылааҕынан таҕыстылар.
Биир дойдулаахтарбытын – Төҥүлү нэһилиэгин баһылыгын Петр Васильевич Эверстовы, Г.Р.Десяткин аатынан спортивнай комплекс дириэктэрэ Алиса Ивановна Куприянованы, нэһилиэк спортсменнарын, олохтоохторун өтөрүнэн буолбатах улахан ситиһиилэринэн ис сүрэхтэн истиҥник эҕэрдэлиибит. Салайааччылар тапталлаах “Эркээйи” хаһыаттарын нөҥүө ситиһиигэ үлэлэспит нэһилиэктэрин тириэньэрдэригэр, спортсменнарыгар олохтоох дьаһалта уонна успуорт киинин ааттарыттан махталларын тиэрдэллэр.
Марелла Баишева.
