Буҕаалтыр идэлээх Майа олохтооҕо, биэнсийэлээх Полина Осипова мэлдьи дьоҥҥо көмөлөһөрүн, үтүөнү оҥорон дьону үөрдэрин туохтааҕар да сөбүлүүр. Кини анал байыаннай дьайыы саҕаланыаҕыттан “Дьол түһүлгэтигэр” үлэлиир “Түмэн” уопсастыбаннай холбоһук ииһин сыаҕар кэлэн бастаан иискэ көмөлөһөн, тигиллибит көстүүмнэри ситэрэллэригэр көмөлөһөн саҕалаабыта. Ол быыһыгар уопсастыбанньыктарга эбиэттэрин бэлэмниир буолбута. Манна түмсүүлэр, түөлбэлэр көхтөөх дьонноро, оскуола оҕолоро сылдьаллар, ким иистэнэр, ким хахха сиэккэ оҥорор, атын да аахсыйалар ыытыллаллар.
“Дьол түһүлгэтигэр” сарсыардаттан үлэ күөстүү оргуйар, иистэнэллэр, сиэккэ баайаллар. Кинилэргэ Полина Ивановна күнүскү аһылыктарыгар миин буһаран итии аһылыгынан хааччыйар. 2024 сыл күһүнүттэн «түмэннэргэ» урбаанньыт Сергей Кривогорницын “Татьяна” маҕаһыына сыстан аһынан-үөлүнэн: кэнсиэрбэнэн, хортуоппуйунан, саахарынан, лапсанан, о.д.а. көмөлөһөр. Маны барытын волонтер сыа-сым курдук тутан, остуолга ууруллар ас оҥорор. Кини “Түмэн” иһинэн ыытыллар туох баар үлэлэргэ күүһэ тиийэринэн көмөлөһөр. Киэһэлик дьиэни-уоту хомуйан, сууйан сарсыҥҥы күҥҥэ бэлэмнээн барар.
Уопсастыбанньык, икки оҕолоох ийэ тус холобурунан оҕолорун иитэр. Кыыһа Айна ХИФУ хотугу норуоттар тылларын үөрэтэр институтун саха тылын уонна литэрэтиирэтин салаатыгар 4-с куурус устудьуона, “Сулус” устудьуоннар этэрээттэрин хамандыыра. 2024 с. “Устудьуоннар этэрээттэрин бастыҥ хамандыыра” анал аат кыайыылааҕа буолбут. Уола Кирилл Майатааҕы Ф.Г.Охлопков аатынан орто оскуола 10-с “а” кылааһын үөрэнээччитэ, “Түмэн” волонтера. Ааспыт сыл Майа сэлиэнньэтин “Бастыҥ” бириэмиэйэтин номинана буолан статуэтканан, дипломунан наҕараадаламмыта.
Полина Осипова бу күһүн ыытыллыбыт Бүтүн Арассыыйатааҕы “Человек идущий” фоновай хаамыы бырайыагар кыттан “Новострой” түөлбэ олохтоохторун икки ардыларыгар 1-кы миэстэ буолбута. Кини Ф.Г.Охлопков аатынан орто оскуола 10 “а” кылааһыгар төрөппүт кэмитиэтин бэрэссэдээтэлэ. Бу күннэргэ оскуола оҕолорун уопсастыбаннай үлэҕэ көҕүлээн анал байыаннай дьайыыга дойду көмүскэлигэр ытык иэһин төлүү сылдьан сырдык тыынын толук уурбут байыас Иннокентий Куприянов ийэтэ Антонина Петровнаҕа кылааһынан тиийэн олбуорун иһин-таһын хаарын ыраастаан көмөлөстүлэр. Оҕолор үөрэхтэрин кэннэ кылааһынан кэлэн «түмэннэргэ» хаар күрдьэн, муус киллэрэн көмөлөһөллөр. Көхтөөх уопсастыбанньык Майа сэлиэнньэтин 2024 сыл бастыҥнарын бэлиэтиир дьоро күнүгэр “Бастыҥ волонтер” бириэмиэйэтин кыайыылааҕа буолбута. Полина Ивановна улууспут “Эркээйи” хаһыатын волонтерунан үһүс сылын үрдүк эппиэтинэстээхтик үлэлиир. Хаһыаты тахсыбыт күнүгэр эрэдээксийэттэн “буруолаппытынан” ылан тыыл бэтэрээннэригэр аадырыстарынан уонна түмэннэргэ тиэрдэр.
Уопсай дьыала туһугар бэриниилээх волонтербутугар үтүө санаата хаһан да уостубатыгар, өрүү инники күөҥҥэ сылдьан дьонун-сэргэтин махталын ыла турарыгар баҕарабыт.
Марелла Баишева.
