Сочи куоракка балаҕан ыйын 22-27 күннэригэр доруобуйаларынан хааччахтаах дьоҥҥо XIII Бүтүн Арассыыйатааҕы култуура уонна успуорт бэстибээлэ ыытылынна.
Остуол тиэнниһэ, дартс, дуобат, саахымат, парабиатлон, трейл хайысханы булуу, кэлээскэлээх керлинг, бочча курдук көрүҥнэргэ уопсайа 12 хамаанда илин-кэлин түһүстүлэр.
Манна биһиги улуустан
Валентин Борисов (Бүтэйдээх) – остуол тиэнниһигэр I миэстэ, керлиҥҥа II миэстэ, дартска III миэстэ,
Светлана Матвеева (Бөкө) – остуол тиэнниһигэр II миэстэ, дуобакка I миэстэ, парабиатлоҥҥа II миэстэ,
Алексей Давыдов (Майа) – остуол тиэнниһигэр III миэстэ, парабиатлоҥҥа I миэстэ, дартска III миэстэ,
Любовь Саввина (Бөкө) — дартска I миэстэ,
Людмила Слепцова (Майа) – дартска III миэстэ, остуол тиэнниһигэр III миэстэ буолары ситистилэр.
Санатар буоллахха, Валентин Борисов, Светлана Матвеева, Алексей Давыдов бу сайын Амма улууһугар ыытыллыбыт «Дьулуур» өрөспүүбүлүкэтээҕи успуорт адаптивнай көрүҥнэригэр XIV ыспартакыйаадаҕа улууспут аатын чиэстээхтик көмүскээбиттэрэ.
Маны таһынан Московскай уобалас Раменскай куоратыгар балаҕан ыйын 30 — алтынньы 6 күннэригэр олорон эрэ волейболга Арассыыйа чөмпүйэнээтэ буолла. Манна Мэҥэ Хаҥалас улууһуттан 5 киһи өрөспүүбүлүкэ сүүмэрдэммит хамаандатын састаабыгар киирэн бэрт таһаарыылаахтык оонньоотулар: Светлана Андросова (Төҥүлү), Дария Апросимова (Майа), Мария Пермякова (Төхтүр), Семен Баишев (Хара), Петр Никитин (Нахара).
Эрийсиилээх ооонньуу түмүгэр кыргыттар хамаандалара Арассыыйа боруонса призёра буолла.
Уолаттар, сэрэбиэйдэрэ арыый табыллыбакка, бастакыттан олус күүстээх хамаандалары кытта чиэстээхтик утарылаһан, түмүккэ 7-с миэстэ буоллулар.
Түмүктээн эттэххэ, олорон эрэ волейбол көрүҥэр өрөспүүбүлүкэ сүүмэрдэммит хамаандатын састаабыгар биһиги улууспут 5 бастыҥ спортсмена киирэн бүтүн Саха сирин аатын көмүскүүр чиэскэ тиксибитэ бу улахан эппиэтинэс буоларын ааһан, элбэх үлэттэн тахсарын бэлиэтиэх кэриҥнээхпит. Кэнники 3 сылга олорон эрэ волейболга Мэҥэ Хаҥалас сүүмэрдэммит хамаандатыттан 6 киһи РФ успуордун маастарыгар хандьыдаат уонна 1 киһи успуорт маастарын нуорматын толорбуттарын туһунан инбэлииттэр улуустааҕы уопсастыбаларын бэрэссэдээтэлэ Тамара Пермякова иһитиннэрдэ.
Биһиги кэр.
