Олунньу 15 күнүгэр Мэҥэ Хаҥалас улууһун сиригэр-уотугар СӨ ситэриилээх былааһын ааспыт сыллааҕы үлэтин отчуота күн бастакы аҥаарыгар бастакы бөлөххө Бүтэйдээх нэһилиэгин олохтоохторугар туруорулунна.
Мунньаҕы нэһилиэк баһылыга Айаан Чичахов аста. Салгыы мунньаҕы улуус баһылыга Дмитрий Тихонов салайан ыытта.
Бырабыыталыстыба үлэтин отчуотун биир дойдулаахпыт, СӨ «Уу хаһаайыстыбатыгар уонна халаан содулун туоратан чөлгө түһэрэр үлэни тэрийиини толорор дириэксийэтэ» судаарыстыбаннай хааһына тэрилтэтин дириэктэрэ Гаврил Слободчиков оҥордо. Кини өрөспүүбүлүкэ экэниэмэкэтин итиэннэ нэһилиэнньэ олоҕун хаачыстыбатын тупсарыыга олох бары салааларынан, хайысхаларынан ыытыллыбыт сүрүн үлэни-хамнаһы билиһиннэрдэ.
Олохтоохтор дьон-сэргэ бүттүүнүн долгутар кыһалҕаларын таарыйан нэһилиэккэ оҕо саадын, култуура киинин, АЗС тутуллуутугар, балыыһаҕа стационар отделениетын аһыллыытыгар, Өлөчөйтөн Бүтэйдээххэ диэри суол өрөмүөнүн болдьоҕун чуолкайдааһыҥҥа, араас өҥөлөргө судаарыстыба пошлината сыллата үрдүүрэ охсуулааҕын, биэнсийэ кэээмэйэ кыратын, оттуур ходуһалары нүөлсүтүүгэ сыһыаннаах о.д.а ыйытыылары биэрдилэр.
Нэһилиэк баһылыгынан өр сылларга үлэлээбит үлэ бэтэрээнэ Алексей Игнатьев өрөспүүбүлүкэ Бырабыыталыстыбатын ыытар үлэтин үчүгэйинэн сыаналаата. Алексей Николаевич Ил Түмэн дьокутааттара Арассыыйа таһымыгар ылыныллар сорох сокуоннарга саха омук уратытын туруулаһаллара, дьокутааттар юридическай өртүнэн олохтоох дьон укулаатын көмүскүүллэрэ наадалааҕын сиэрдээхтик ыйда. Холобур, балыктааһыҥҥа, бултааһыҥҥа сыһыаннаах сокуоннарга. Кини Чечня Өрөспүүбүлүкэтигэр итиниэхэ сөптөөх үлэ барарын аҕынна. Салгыы бэйэтин этиитигэр тыа сиригэр ыччаты олохсутууга аналлаах бырагыраамалар, бырайыактар олохтоноллорун, Куоллара үрэҕин туоруур муоста алдьанан ону саҥардыыны туруоруста.
Педагогическай үлэ бэтэрээнэ, кыраайы үөрэтээччи Константин Родионов нэһилиэк олохтоохторун сүрүн туруорсуулара ‒ социальнай-култуурунай эбийиэктэр тутуулара өрөспүүбүлүкэ салалтатынан болҕомтоҕо ылылларыгар итиэннэ инникитин отчуоттуур бөлөх састаабыгар тутаах министиэристибэлэр эппиэттээх үлэһиттэрэ киллэриллэн кытталларыгар баҕа санаатын тиэртэ.
Салгыы тыл эппит бэтэрээннэрэ Давлят Назаров Абалаах суолун оҥорон санаторийы миэстэтигэр көһөрөллөрүгэр, Мариса Сидорова сүөһү иитиитинэн дьарыктанан кэтэх хаһаайыстыбалаах эдэр дьоҥҥо үлэ ыстааһа ааҕылларыгар, ыччаттарбыт аныгы технологиялар идэлэрин баһылыылларыгар болҕомто уурулларыгар, Евдокия Игнатьева сүөһү ахсаанынан көрүллэр көмө харчы ылбыт дьон үүтү туттарбат буолбуттарынан утарарын туһунан санааларын үллэһиннилэр.
Ситэриилээх былаас отчуоттуур мунньаҕар уопсайа 46 киһи кытынна.
Алена Докторова.
