Быйаҥнаах, өҥ сайын буолуохтун

Ньукуолун күнэ саха дьонугар биир хаары этэҥҥэ уулларан күөххэ үктэммит күүтүүлээх күндү кэммит буолар.

Бу күн Дьабыыл нэһилиэгин эр бэртэрэ сыллата бэтэрээннэригэр кус амсаталлар.

Нэһилиэк Далбар Хотуттара күн бастакы аҥарыгар уһун кыстыгы этэҥҥэ туораан самаан сайыҥҥа үктэнэр Ньукуолун күнүнэн, Сахабыт сиригэр Сайылык күнүнэн айылҕа анаан айбыт хатыҥнаах Чараҥар киирэн Үрдүк Айыыларыгар махтанан алгыс көтөхтүлэр, салама ыйаатылар.

Нэһилиэк байанайдаах булчуттара аҕам саастаах дьонноругар сыллата кус миинэ иһэрдэр үтүө үгэстээхтэр. Ол чэрчитинэн К.Д.Борисов аатынан култуура дьиэтигэр олохтоох дьаһалта уонна култуура үлэһиттэрин көҕүлээһиннэринэн бочуоттаах сынньалаҥҥа олорор үлэ бэтэрээннэригэр сибиэһэй кус миинин иһэртилэр, саламаатынан күндүлээтилэр, алаадьынан айах туттулар.

Нэһилиэк талба талааннаахтара бэтэрээннэрин сайыҥҥы кэрэ кэмҥэ үктэммит үөрүүлээх күннэринэн эҕэрдэлээн ырыаларын-тойуктарын бэлэхтээтилэр. Тэрийээччилэр бириистээх оонньуулары ыытаннар мантан сайын олордуллар оҕуруот аһын сиэмэтинэн хааччыйдылар. Тэрээһин кыттыылаахтара үөрэн-астынан, кусчут уолаттарга махтанан тарҕастылар.

Сайыммыт быйаҥнаах буолуохтун, оҕуруот, сир аһа өлгөмнүк үүнүөхтүн, сыспай сиэллээхпит элбээн истин, хороҕор муостаахпыт хойуннун.

 

Марелла Баишева.