Бүгүн, алтынньы 17 күнүгэр, Майатааҕы «Кыталык» уопсастыбаннай кииҥҥэ «Үрүҥ торуоска» дэкээдэ үөрүүлээх аһыллыыта буолла.
Биллэрин курдук, көрбөт дьоҥҥо торуоскалара кинилэр харахтарын кэриэтэ. Алтынньы 15 күнүттэн сэтинньи 13 күнүгэр диэри Арассыыйаҕа, ол иһигэр биһиги улууспутугар, хараҕа суохтарга ананар дьаһаллар: сэминээрдэр, “төгүрүк остуоллар”, дьарыктар, көрбөт дьон кыһалҕаларын билиһиннэрэр бэсиэдэлэр ыытыллаллара былааннанар.
Улуустааҕы көрбөттөр уопсастыбаларын чахчытынан, биһиги улууспутугар 101 мөлтөхтүк көрөр уонна 10 олох көрбөт киһи олорор. Бу сыллар усталарыгар көрбөттөр уопсастыбаларын кытары И.М.Сосин аатынан улуустааҕы киин бибилэтиэкэ кэлэктиибэ ыкса сибээстээхтик бииргэ үлэлээн кэллибит, араас өрүттээх дьаһаллары тэрийдибит.
«Үрүҥ торуоска» дэкээдэ үөрүүлээх аһыллыытыгар Мэҥэ Хаҥалас улууһун баһылыгын социальнай уонна имиджевэй бэлиитикэҕэ солбуйааччы Альбина Григорьева, улуустааҕы нэһилиэнньэ социальнай көмүскэллээх буолуутун управлениетын начаалынньыга Иван Шестаков, «Майа сэлиэнньэтэ» тыа сирин түөлбэтин баһылыгын солбуйааччы Вячеслав Санников, хараҕынан көрбөттөр улуустааҕы уопсастыбаларын бэрэссэдээтэлэ Иван Семенов, инбэлииттэр улуустааҕы уопсастыбаларын бэрэссэдээтэлэ Тамара Пермякова эҕэрдэ тылларын эттилэр. Көрбөттөр уопсастыбыларын актыыбынай чилиэннэригэр Марфа Алексееваҕа, Виктория Христофороваҕа оройуон баһылыгын Махтал суругун Альбина Андреевна үөрүүлээх быһыыга туттарда. Улуустааҕы социальнай көмүскэллээх буолуу управлениетын начаалынньыга Иван Шестаков уопсастыба көхтөөх чилиэннэригэр Яна Стручковаҕа, Василий Алексеевка, Марфа Алексееваҕа, Виктория Христофороваҕа эҕэрдэ суруктарын туттарда. Култуура управлениетын начаалынньыгын солбуйааччы Эмма Павлова Татьяна Цыденжаповаҕа Махтал суругун туттарда. Улуустааҕы инбэлииттэр уопсастыбаларын бэрэссэдээтэлэ Тамара Пермякова Марфа Васильевна Алексееваны 75 сааһынан эҕэрдэлээтэ. Улуустааҕы киин бибилэтиэкэ кэлэктиибин аатыттан Марфа Алексееваҕа, Светлана Иванова-Намыынаҕа эҕэрдэ суруктары туттардыбыт.
Тэрээһин кыттыылаахтара «Кэрэл» тифлокомментарийдаах сахалыы киинэни көрөн, сорох түгэннэргэ уйадыйан, астынан тарҕастылар. Бэлиэтээн эттэххэ, харахтарынан көрбөт дьоҥҥо анаан Өрөспүүбүлүкэтээҕи көрбөттөр бибилэтиэкэлэрэ тифлокомментарийдаах киинэлэри оҥорон бэлэмнииллэр.
Марина Трифонова,
И.М.Сосин аатынан улуустааҕы киин бибилэтиэкэ бибилэтиэкэрэ.
