Атырдьах ыйын 26‒27 күннэригэр III Мэлдьэхси (Томтор) сиригэр-уотугар, Кумах Күөл сынньалаҥ-туристическай киинигэр сорсуннаах булчуттар ини-бии Егор уонна Сергей Никифоровтар сырдык ааттарыгар «Собо‒2023» аһаҕас өрөспүүбүлүкэтээҕи күрэхтэһии буолан ааста.
Сүрүн тэрийээччинэн уолаттар аҕалара сынньалаҥ киин салайааччыта ‒ Валерий Никифоров турда. Үөрүүлээх-быһыыга майгыга Валерий Никифоров уонна улуус спортивнай кэмитиэтин салайааччыта Иннокентий Баишев мустубут дьону эҕэрдэлээн, күрэхтэһиини арыйдылар.
Бар дьон ортотугар тэрийээччилэр Максим Горькай аатынан сопхуос Томтордооҕу отделениетын кадровай булчутун Дмитрий Афонскайы өрөгөйдөөх үбүлүөйүнэн 60 сааһынан итиитик-истиҥник эҕэрдэлээтилэр, өйдөбүнньүк бэлэхтэри туттардылар.
Судьуйанан «Төрүт үгэс» федерация толороччу дириэктэрэ Дмитрий Сидоров үлэлэлээтэ. 5 хамаанда илин-кэлин былдьастылар: бириэмэҕэ илим үтүүгэ уонна хомуйууга, тыынан устан киирэн эргиллии эстэпиэтэҕэ, илим үтэн баран сарсыныгар ким төһө элбэх собону туттарыытыгар, булт-алт эйгэтигэр викторинаҕа, хапсаҕайга, мас тардыһыытыгар, канат былдьаһыытыгар, итиэннэ ким элбэх собону сиэһиҥҥэ көхтөөх ыалдьааччылаах, уоттаах-төлөннөөх күрэстэр буоллулар.
Бастакы миэстэ III Мэлдьэхситтэн «Туску» хамаанда буолан биирдии бэйэлэрэ казанынан уонна булт маҕаһыыннарын Туоһу суруктарынан наҕараадаланнылар. «Хоту» хамаанда иккис, «Байанай оҕолоро» хамаанда үһүс миэстэ буоллулар. Итиэннэ хапсаҕайга, мас тардыһыытыгар, кырдьаҕас уонна эдэр балыксыт аатыгар, түргэн-тарҕан туттууга, улахан собоҕо, саамай актыыбынай кыттааччыга уонна да атын ааттарга кыттыбыт дьон-сэргэ барыта тигистэ.
Аламаҕай асчыттар түүннэри-күннэри балаҕаҥҥа ас астаан түбүгүрдүлэр: ыһаарыламмыт, буспут собо, ыргыччы буспут эмис эт миинэ, итии чэй, алаадьы, бэрэски, сугун барыанньата о.д.а. саха талбыт аһа барыта баар буолла. Бириистэри Никифоровтар дьиэ кэргэн, кинилэр чугас аймах-билэ дьоно ‒ III Мэлдьэхси нэһилиэгин олохтоохторо, улуус дьаһалтата, булт маҕаһыыннарын салайааччылара уонна урбаанньыттар туруордулар. Анаабыт курдук икки күн бэркэ туран биэрдилэр.
Евгений Васильев.
