Сочига ыытылла турар доруобуйаларынан хааччаахтаах дьон Арассыыйатааҕы бэстибээллэригэр Саха сирин хамаандата ситиһиилээхтик кытта сылдьар.
Мэҥэ Хаҥалас Бүтэйдээҕиттэн төрүттээх олорон эрэн остуол тиэнниһигэр күрэхтэһиигэ былырыыҥҥы бэстибээл чөмпүйүөнэ Валентин Борисов быйыл иккис миэстэ буолла. Кини Калмыкияттан сылдьар Арассыыйа чөмпүйэнээтин кыттыылааҕар Аранзал Болдыревка аҕыйах очукуонан баһыйтаран, үрүҥ көмүс мэтээлгэ тигистэ.
Оттон дартс көрүҥэр эмиэ биир дойдулаахпыт Майаттан сылдьар Евгений Птицын бастыҥнар кэккэлэригэр дьоһуннук киирдэ.
Кини үһүс үктэлгэ тахсыбыт Денис Рябовы (Москва) 81 очукуонан хаалларан, үрүҥ көмүс мэтээли эрэллээхтик ылла. Былырыыҥҥы бэстибээлгэ Евгений Птицын 428 очукуоланан төрдүс миэстэ буолбута.
Ити көрдөрүүтүн кини бу күннэргэ 503-кэ тиэрдэн, сыл устата утумнаахтык дьарыктаммытын арылхайдык көрдөрдө. Бу сырыыга кини чөмпүйүөн буолбут Денис Фоминтан (Москва) алта эрэ очукуонан быысаһан, үрүҥ көмүс призер буолла.
Иллэрээ сыл Евгений Птицын СӨ Ил Дарханын Гранын ылан, дойдутугар бу успуорт көрүҥэ сайдыытыгар туһаайбыта.
Альбина Тарабукина.
