Арассыыйа Бэрэсидьиэнэ Владимир Путин ыйааҕынан кулун тутар 1-7 күннэригэр Сочи куоракка ыытылла турар Аан дойдутааҕы ыччат бэстибээлигэр Мэҥэ Хаҥалас улууһун Нөөрүктээйи нэһилиэгиттэн ХИФУ хотугулуу-илиҥҥи омуктар тылларын уонна култуураларын үөрэтэр институт ыччаты кытта үлэни тэрийэр салаатын 1-кы кууруһун устудьуона Алина Китаева кыттыыны ыла сылдьар. Кини “Эркээйи” хаһыат ааҕааччыларыгар анаан санаатын үллэстэр:
— Бу биһиги Бэрэсидьиэммит ыйааҕынан ыытылла турар Аан дойдутааҕы ыччат бэстибээлэ биһиэхэ, ыччакка, саамай улахан хабааннаах сабыытыйа буолар. Сүрүн дэбииспит «Бары бииргэ инникини түстүөҕүҥ» (“Начнем будущее вместе!”) диэн. Бэстибээл биир сүрүн соругунан эдэр, көхтөөх дьону биир кэккэҕэ түмүү, кинилэр кыахтарын инники олохпут сайдыытыгар туһулаан бииргэ үлэлэһэллэрин ситиһии, сайдар саҕахтары арыйыы, атын омуктар ыччаттарыгар биһиги модун Арассыыйабыт бары кыаҕын арыйан көрдөрүү, билиһиннэрии буолар. Бэстибээлгэ Арассыыйаны сэргэ араас омук ыччатын, оҕолор тэрилтэлэрин уонна холбоһуктарын 20000 лиидэрдэрэ бэйэлэрин хайысхаларынан интэриэстэрин көрдөрөн үлэлэрин сырдаттылар. Тэрийээччилэр олус баай ис хоһоонноох тэрээһиннэри ыытаннар; доҕордоһуу хоробуотун, омуктарын бэлиэтиир национальнай көстүүмнээх хаамыылары, бэлиитиктэр, учуонайдар лиэксийэлэрин, киэҥник биллибит актердары, муусукааннары, спортменнары кытта көрсүһүүлэри, о.д.а. ыччаты кэрэхсэтэр хайысхалары киэҥник хабан сырдатан элбэх билиини ыларбытыгар кыаҕы биэрдилэр. Мантан наһаа элбэх туһалааҕы бэйэбитигэр иҥэринэ сылдьабыт. Бэстибээл хас биирдии кыттыылааҕын олоҕор бу устуоруйаҕа хаалар суолталаах кэрэ-бэлиэ умнуллубат түгэнинэн буолла. Миэхэ манна кыттар чиэһи биэрбиттэригэр өрөспүүбүлүкэм салалтатыгар улахан махталбын тиэрдэбин. Ыччат диэн биһиги модун күүстээх дойдубут бүгүҥҥү уонна инники олоҕун тутааччыта. Биһиги өрөспүүбүлүкэбит, дойдубут бүттүүнэ сайдар олугун уурсар ытык иэстээхпит.
Дойдубут инники сайдыытыгар ыччат оруола улахан. Киэҥ билиилээх, сайдыылаах, ыарахантан чаҕыйбакка иннин диэки дьулуһар, ыччаты түмэр, көҕүлүүр кыахтаах, бэйэтин саастыылаахтарыгар холобур буолар Алина Китаева курдук биир дойдулаахпытынан киэн туттабыт.
Марелла Баишева.
