Муус устар 20 күнүгэр бүтүн Арассыыйа үрдүнэн бэлиэтэнэр үгэскэ кубулуйбут «Библионочь-2024» тэрээһини Майатааҕы И.М.Сосин аатынан киин бибилэтиэкэ (салайааччы Марианна Никанорова) 10 төгүлүн бэрт сэргэхтик, үрдүк таһымнаахтык тэрийэн ыытта. Быйылгы “Библионочь-2024” аахсыйа «Дьиэ кэргэнинэн ааҕабыт” диэн тиэмэлээх Арассыыйаҕа Дьиэ кэргэн, Өрөспүүбүлүкэҕэ Оҕо саас сылларыгар ананна.
Бу күн ыалдьыттары көрсө “Дьиэ кэргэн минньигэс бүлүүдэтэ” диэн ааттаах библиобуфет үлэлээтэ. “Дьиэ кэргэн сөбүлээн астыыр бүлүүдэтэ” куонкуруска Валентина Мартынова, Фекла Дмитриева, Екатерина Дмитриева кыттан, астаабыт астарын аукционнаан атыылаатылар.
Ааҕааччыларга “Дьиэ кэргэн кинигэтин реликвията” ретро-быыстапка турда. Манна Валентина Мартынова, Николай Рожин 1939 сылтан саҕалаан мунньубут кинигэлэрэ дьон-сэргэ биһирэбиллэрин ылыан ылла. “Ааҕабыт-атастаһабыт” диэн ааттаммыт буккоринг-зонаҕа ааҕааччылар аахпыт кинигэлэрин атастаһан, дьиэтээҕи бибилэтиэкэлэрин хаҥаттылар. “Дьиэ кэргэнинэн ааҕабыт” диэн хаартыскаҕа түһэр миэстэҕэ баҕалаахтар бу күнү өйдүү-саныы сылдьарга үйэтиттилэр.
Бэлиэ күн үөрүүлээх чааһыгар улуус баһылыгын социальнай боппуруостарга уонна имиджевай бэлиитикэҕэ солбуйааччы Альбина Григорьева элбэх киһини хабан, айымньылаахтык үлэлии сылдьар киин бибилэтиэкэ үлэһиттэрин эҕэрдэлээтэ. “Чолбон” сурунаал тэрийиитинэн “Чолбон – өй күрэҕэ” диэн өрөспүүбүлүкэтээҕи ааҕар дьиэ кэргэн оонньуутугар улуус чиэһин үчүгэйдик көмүскээбит Нөөрүктээйи нэһилиэгиттэн Захаровтар дьиэ кэргэҥҥэ, «Эһиги бар дьоммутун ааҕыыга көҕүлүүгүт”, – диэн махтанан туран, баһылык Дмитрий Тихонов наҕараадатын туттарда.
Быйылгы Төрөөбүт тыл уонна сурук-бичик күнүн чэрчитинэн сахалыы дьыктааны, Олоҥхо дэкээдэтин чэрчитинэн “Олоҥхо дьыктаанын” туйгуннук суруйбуттары сыанаҕа таһааран чиэстээтилэр. Аллараа Бэстээххэ Уйгулаана Попова, Ольга Степанова, Марина Семенова, Варвара Федорова, Альбина Григорьева, Анна Стручкова, Айталина Васильева туйгуннук суруйбуттар. Майаҕа ыытыллыбыкка туйгун сыананы Саргылана Горохова, Нюргуяна Шергина, Юриана Сидорова, Анастасия Алексеева, Капиталина Игнатьева ылбыттар. «Олоҥхо дьыктаанын” туйгуннук педагогическэй үлэ бэтэрээнэ, СӨ үөрэҕириитин туйгуна, Үһүс көлүөнэ оскуолатын литэрэтиирэ түмсүүтүн салайааччыта Валентина Аманатова, Светлана Пинигина суруйбуттар.
«Литэрэтиирэҕэ дьиэ кэргэн мэтириэтэ» (“Семейные портреты в литературе”) хаартысканан куонкуруска улуус дьиэ кэргэттэрэ көхтөөх кыттыыны ылбыттар. “Айымньылаах дьиэ кэргэн” анал ааты (“Лучшая творческая семья”) Ирина, Ким Нестеровтар ыллылар. “Улахан, дьоллоох дьиэ кэргэн” анал аат (“Большая дружная семья”) Сардаана, Павел Пестряковтар иҥэрилиннэ. “Ураты көрүүлээх дьиэ кэргэн” (“Лучшая креативная семья”) Елизавета, Герман Неустроевтар буоллулар. “Үтүө үгэстээх дьиэ кэргэн” (“Золотая семья – хранитель традиции”) Марфа, Федот Алексеевтар ааттаннылар. “Көрөөччү биһирэбилэ” анал аакка (“Приз зрительских симпатий”) интэриниэт ситиминэн куоластааһын түмүгүнэн элбэх куолаһы ылбыт Ольга, Степан Даниловтар кыайыылаах таҕыстылар. “Эркээйи” хаһыат эрэдээксийэтэ (кылаабынай эрэдээктэр Алена Докторова) сыл аҥардааҕы хаһыакка суруйтарыыны Мария, Михаил Левиннаргэ, Светлана Пинигинаҕа, Александра Борисоваҕа, Валентина Кириллинаҕа биэрдэ.
Бибилэтиэкэҕэ күннэтэ саҥаны-сонуну билиэн-көрүөн баҕалаах, кинигэни умсугуйан, сөбүлээн ааҕар, холобурга сылдьар бастыҥ ааҕааччылары “Ааҕааччы сулустаах чааһа” диэн ааттаан чиэстээтилэр. “Ааҕар дьиэ кэргэн” ааты Светлана, Александр Чириковтар, “Ааҕар саала лиидэрэ” Майатааҕы лиссиэй үөрэнээччитэ Анжелина Черкашина, “Бастыҥ ааҕааччы” Надежда Мохначевская, “Актыыбынай ааҕааччы” Никифор Егоров, Федот Харитонов, “Бибилэтиэкэ доҕоро” Марфа Алексеева, “Элбэҕи билиэн баҕарар дьиэ кэргэн” (“Самая любознательная семья”) Анастасия, Василий Алексеевтар ааттаннылар. Сыл устата үгүс тэрээһини бииргэ ыыппыт улуустааҕы “Таммахтар” литэрэтиирэ холбоһугар (салайааччы Наталья Пахомова) “Айымньылаах доҕордоһуу” анал ааты туттардылар.
Үөрүүлээх тэрээһини И.М.Сосин аатынан улуустааҕы киин бибилэтиэкэ үлэһиттэрэ кыттыылаах “Сардаана” вокальнай ансаамбыл, СӨ култууратын үтүөлээх үлэһитэ Сардаана Осипова ылбаҕай ырыаларынан, “Кыталыына” үҥкүү бөлөҕө (салайааччы Туяра Стручкова) кэрэ үҥкүүлэринэн киэргэттилэр.
Салгыы улуустааҕы киин бибилэтиэкэ кэлэктиибэ быйылгы Василий Степанов аатынан култуура уонна успуорт эстэпиэтэтигэр Майа сэлиэнньэтин тэрилтэлэрин икки ардыларыгар ыытыллыбыт “Ходулов-фест” күрэхтэһиигэ кыайыылаах тахсыбыт Федерико Гарсиа Лорка “Бернарда Альба дьиэтэ” драматынан испэктээк оонньоон көрдөрдүлэр.
Түмүккэ хамаанданан “Билээччи” (“Знаток”) диэн ааттаах үбүлүөйдээх онус төгүлүн ыытыллар өй-билии оонньуута буолла. Манна 10 хамаанда күөн көрүстэ: нолуок сулууспатын, Майатааҕы бастакы уонна иккис нүөмэрдээх оскуола, “Кыталыына” үҥкүү бөлөҕүн, оройуон дьаһалтатын, улуус бааннарын холбоһуктаах хамаандалара, бэрээдэги араҥаччылыыр уорган (полиция) үлэһиттэрэ, “Теплотрасса” диэн ааттаммыт хамаанда. Ону сэргэ быйыл бастакытын улууспут үрүҥ халааттаах аанньаллара, “Таммахтар” литэрэтиирэ түмсүүтэ хамаанда туруоран кытыннылар. Оонньууну Феликс Титов ыытта. Кини маннык оонньууну ыыппыта номнуо 23-с сыла буолар. Өйү тургутар оонньууга “Туох? Ханна? Хаһан?” (“Что? Где ? Когда?”) биэрии архыыбыттан ыйытыылары, классика муусукаттан, араас сылларга биллэр киинэлэргэ тыаһаабыт муусукалары таайдылар. Хас биирдии боппуруоска, биирдии мүнүүтэ бэрилиннэ. Хамаандалар киэҥ билиилэрин тургутан көрдүлэр. Эрийсиилээх оонньуу кэннэ “Теплотрасса” хамаандатын биир очкуонан ситэн, 16 очкуолаах оройуон дьаһалтатын хамаандата кыайда. Уонна уу харчынан биэс тыһыынча солкуобай суумалаах бириистэннэ.
Ааҕааччылар тэрээһинтэн сүргэлэрэ көтөҕүллэн, үөрэн-көтөн тарҕастылар.
Елизавета Неустроева.
