Федора Наумова,
Майатааҕы “Түмэн” уопсастыбаннай холбоһук сүбэтин чилиэнэ, анал байыаннай дьайыы буойуннарыгар иистэнэр сыах салайааччыта:
— Арассыыйа Бэрэсидьиэнэ Владимир Путин Федеральнай Мунньахха сыллата оҥорор анал этиилэрин истэбин. Быйыл Арассыыйаҕа Дьиэ кэргэн сыла биллэриллибитэ барыбытын үөрдүбүтэ. Дьиэ кэргэн сүрүн сыала оҕо төрөтөн удьуору тэнитии буолар диэн элбэх оҕолоох дьиэ кэргэн олохпут нуормата буоларын өйүүр “Дьиэ кэргэн” национальнай бырайыагы олохтуурун биллэрдэ. Дьиэ кэргэн ипотекатын 2030 сылга диэри уһатарга, Ийэ хапытаалын 2030 сылга диэри уһатарга этиилэрин, ону тэҥэ “Уһун үйэлэнии уонна көхтөөх олох”, “Арассыыйа ыччата” национальнай бырайыактары олоххо киллэрэрин биһирии иһиттим.
Анал байыаннай дьайыы кыттыылаахтарыгар, бэтэрээннэригэр бары өттүнэн өйөбүлү оҥорорго, баҕарар үрдүк үөрэхтэригэр киирэллэрин өйүүргэ эппитэ биһиги күүстээх аҥардарбыт бэйэлэригэр эрэллэрин күүһүрдүө, бигэ тирэхтээх буолалларыгар төһүү күүс буолуо. Майа сэлиэнньэтигэр Чөл олох сыла, дэкээдэ ыытылла турар. Түмүгэр «Бросайте пить, вставайте на лыжи” диэн эппитэ биһиэхэ тоҕоостоох буолан, олус астына иһиттим.
Бэрэсидьиэн туһаайыытын этиилэрэ дойду хас биирдии олохтооҕор инникигэ эрэли үөскэтэр дии санаатым.