Олунньу 13 күнүгэр Догдоҥо нэһилиэгэр Бырабыыталыстыба отчуотун Саха Өрөспүүбүлүкэтин гражданскай оборонаҕа, нэһилиэнньэ олоҕор-дьаһаҕар куттал суох буолуутун хааччыйыыга миниистирин солбуйааччы Никита Павлов оҥордо.
Бөкөҕө нэһилиэнньэни кытта көрсүһүүнү баһылык Петр Сивцев салайан ыытта. 47 олохтоох оскуола саалатыгар буолбут отчуокка кэлэн бөлөх салайааччыта Никита Павлов толоруулаах былаас ааспыт сыллааҕы үлэтин сүрүн тосхоллорун ырытар дакылаатын иһиттилэр. Отчуокка СӨ Ил Түмэн Судаарыстыбаннай Мунньаҕын сиргэ сыһыаннаһыыларга, айылҕа баайыгар уонна экологияҕа сис кэмитиэтин бэрэссэдээтэлэ Андрей Находкин кыттыыны ылла.
Онтон ыйытыыга догдоҥолор Майа – Бөкө итиэннэ бөһүөлэк иһинээҕи суоллары оҥоруу, бу хайысхаҕа оптуобус сырыытын олохтооһун, өрүс суолугар салгын олбохтоох ааллар сыаналарын бэрээдэктээһин, тарыыптар, сыана үрдээһинин, быраастар тиийбэттэрин, кэтэх хаһаайыстыбаҕа субсидияны көрүү, саахалланар туруктаах дьиэҕэ олорор инбэлииттэри дьиэнэн хааччыйыы, олохтоох оскуолаҕа кэлбит «Газель» массыына тоҕо сүүрбэтин, о.д.а. ыйытыыларын биэрэн отчуоттуур бөлөх эппиэттээх үлэһиттэрин хоруйдарын иһиттилэр.
Бөкөҕө «Мин Сахам сирэ XXI үйэҕэ» өрөспүүбүлүкэтээҕи үтүө дьыала хамсааһынын иитинэн тутулла турар култуура-успуорт комплексын ханнык эмэ хайысханан үбүлээһинин көрөн үлэҕэ киириитин түргэтэтэр туһунан култуура дьиэтин дириэктэрэ Айталина Иванова туруоруста.
Өр сыл нэһилиэк баһылыгынан үлэлээбит Иван Новгородов тыа сиригэр тэрээһиннээх хаһаайыстыбалары сайыннарыахха, эти, үүтү оҥорууга арааран тутуохха диэн санаатын үллэһиннэ. Бу эҥэр мэччирэҥ баар буолан олохтоохтор субан сүөһүнэн дьарыктаныахтарын сөп диэтэ. Ол эрээри үлэһит тиийбэтин, бэл, суоппары булар уустугурбутун ыйда. Оҕо уһуйаана эргэрбитинэн оскуолаҕа үһүс этээс эбии тутан балаһыанньаттан тахсыахха сөп эбитэ дуу диэн этии киллэрдэ.
Нэһилиэктэргэ тыа хаһаайыстыбатын эрэ буолбакка, ыччат ылсыан сөптөөх салааларын сайыннарыы наада диэн Альберт Новгородов эттэ. Эдэр дьон интэриэһин тардар дьарыгы булан тэрийдэххэ эрэ кыра нэһилиэктэр эстиэхтэрэ суоҕа диэн санаатын үллэһиннэ. Кини кэргэнэ Николь Новгородова тыа сиригэр арт-эбийиэктэри, тимиртэн тутуллары оҥорор дьарыктаахтарын, Бөкөҕө сир ылан дьон сынньанар пааркатын оҥороллоругар кэккэ ыарахаттары көрсүбүттэрин үллэһиннэ. Инникитин тыа сиригэр оҥорон таһаарыыны, туризмы сайыннарыыга көрүүлэрдээҕин эттэ.
Иван Пивоваров сыллата кыра бөһүөлэктэргэ нэһилиэнньэ ахсаана аччаан иһэрэ долгутарын, тэрилтэлэр үлэһиттэрэ айанныылларыгар оптуобус сылдьара наадатын ыйда. Аксинья Морозова оҕо уһуйаана эргэрбитин, тэллэйдэммитин, саҥа уһуйаан тутуллуор диэри эргэлэрин өрөмүөннүүр булгуччу наадатын туруоруста.
Догдоҥо олохтоохторо өрөспүүбүлүкэ толоруулаах былааһын үлэтинэн астыналларын биллэрдилэр.
Февронья ОХЛОПКОВА.
