Бэдьимэ нэһилиэгэр 59 киһи мустан улуус баһылыга Дмитрий Тихонов ааспыт сыллаах отчуотун иһиттилэр.
Баһылык Петр Андросов мунньаҕы иилээн-саҕалаан ыытта. Бэдьимэлэр өр сыл күүппүт оскуолаларын боппуруоһугар баһылык бастакы хардыы баар, күннэтэ үлэлиибит, хамсааһын тахсыаҕа диэн эттэ. Олохтоохтору суол-иис боппуруоһа, Тиэрэ үрэх муостата, Төхтүр-Бэдьимэ икки ардыгар сырыы баар буолара долгутар. Тыа хаһаайыстыбата көрдүүр отчуотугар дьонтон ылбыт сэлээркэбитин хайдах отчуоттуубут дэстилэр. Балыыһабыт олус эргэрдэ, өрөмүөн наада диэн боппуруоска улуус кылаабынай бырааһа Алексей Павлов икки-үс сылынан саҥа биэлсэр-акушер пуун тутуллуоҕа, быйыл наадалаах өрөмүөн ыытыллыаҕа диэн олохтоохтору олус үөртэ.
Этиилэргэ оҕолорбут тиэхиньикэҕэ оскуола саастарыттан сыстыах этилэр, тырахтарыыс үөрэҕэ наада, нэһилиэккэ кырдьаҕас суоппардары солбуйар илии тиийбэт буолла диэтилэр. Босуобуйа харчыта үрдээн дьон үлэлиэн баҕарбат, оттуур сир тиийбэтин бэрээдэктиир кыах баара буоллар, «Манчаары» кэпэрэтиип үүт харчытын хаһан төлүүрүн, оптуобус сырыытын, Майа буойуната, нэһилиэнньэлээх пууҥҥа киирэргэ сүөһүлэргэ бэлиэ туруорар наадатын эттилэр. Ити курдук нэһилиэк дьоно туруорсара элбэх. Былырыын 8 боппуруос турбуттан, биир боппуруос туолан олоххо киирбит.
Елизавета Неустроева.
