Сыл бүтүүтэ улууспут оскуолаларын саамай чаҕылхай, инники күөҥҥэ сылдьар үөрэнээччилэрин Мэҥэ Хаҥалас улууһун баһылыгын Саҥа дьыллааҕы харыйатыгар ыҥыран чиэстиир үгэс олохтоммута ыраатта. Ол үөрүүлээх тэрээһин ахсынньы 25 күнүгэр Филипп Охлопков аатынан Майа орто оскуолатыгар ыытылынна.
Бырааһынньык үөрэххэ, успуорка, уопсастыбаннай үлэҕэ үрдүк ситиһиилээх, оскуолаларын, улуустарын аатын ааттатар оҕолору түмтэ. Ыллыктааҕы ыралыыр, сырдыгы сырсар, туйгуну тутуһар улууспут киэн туттар оҕолорун, инники эрэллэрин муниципальнай оройуон баһылыга Дмитрий Тихонов эҕэрдэлээтэ:
— Ааһан эрэр сылга эһиги үөрэххитинэн, успуорка, онтон да атын хайысхаларга бастыҥнарынан ааттанан, күн бүгүн бу тэрээһиҥҥэ кыттыыны ылаҕыт. Эһиги ситиһиилэргититтэн биһиги улаханнык үөрэбит. Сотору кэминэн үөрэҕи-билиини баһылаан, олох киэҥ суолугар үктэниэххит, — диэн туран үөрэнээччилэргэ бу олоххо сүрүн быһаарыныыларын – сөбүлүүр идэни баһылаан, бастыҥ үлэһит буоларга дьулуһалларыгар баҕарда. – Кэлэн иһэр сыл эһиэхэ үтүөнү эрэ аҕаллын, өссө элбэх билиини ылан, ситиһиилэргитин өссө чиҥэтэҥҥит, хаҥатаҥҥыт, доҕотторгутугар, бырааттаргытыгар-балыстаргытыгар холобур буолуҥ диэн алгыс тылбын аныыбын, — диэтэ.
Бу күн 2023 сыл түмүгүнэн «Мэҥэ Кэскилэ – 7» үөрэҕирии бырагырааматын чэрчитинэн «Гражданскай уонна патриотическэй иитии», «Удьуор утумун оскуолата», «Идэни талыы – олоххо сүрүн хардыы», «Төрөөбүт дойдум айылҕатын харыстыыбын», «Эт-хаан өттүнэн чэгиэн буолуу уонна доруобуйа култуурата», «Хомус” – оҕолору саха норуотун төрүт муусукатын эйгэтигэр уһуйуу» хайысхаларынан элбэх ситиһиилээх, кыайыылаах оҕолору чиэстээтилэр. Кинилэргэ туоһу суругу улуус баһылыга Дмитрий Тихонов, баһылыгы социальнай боппуруостарга уонна имиджевэй бэлиитикэҕэ солбуйааччы Альбина Григорьева, управлениелар салайааччылара туттардылар.
Бу күн оҕо-ыччат уопсастыбаннай хамсааһынын бастыҥнарын – «Мэҥэ кэскилэ» оҕо тэрилтэтин лиидэрдэрин уонна кинилэр салайааччыларын, өйөөччүлэрин үөрүүлээх быһыыга-майгыга бэлиэтээтилэр.
“Оҕо хамсааһынын өйөөһүҥҥэ бастыҥ үлэлээх нэһилиэк баһылыга” анал аат Балыктаах нэһилиэгин баһылыгар Александр Куприяновка, “Оҕо хамсааһынын өйөөһүҥҥэ бастыҥ үлэлээх оскуола дириэктэрэ” анал ааты Кеша Алексеев аатынан Хаптаҕай орто оскуолатын дириэктэригэр Ирина Кычкинаҕа, “Оҕо хамсааһынын бырагыраамаларыгар бастыҥ үлэлэлээх оҕо уопсастыбаннай түмсүүтүн салайааччыта” анал аат Владимир Ларионов аатынан Майа орто оскуолатын дириэктэри иитэр үлэҕэ сүбэһитигэр Евдокия Прохороваҕа, “Үөрэнээччилэр бэйэни салайыныыларын бастыҥ лиидэрэ» анал аат Владимир Ларионов аатынан Майа орто оскуолатын үөрэнээччитигэр Варя Романоваҕа иҥэриллибитин туоһулуур дастабырыанньалары туттардылар. Оҕо-ыччат көҕүлээһинин өйүүр бастыҥ төрөппүттэргэ махтанан туран, бастыҥ оҕо уопсастыбаннай түмсүүтүн бэрэссэдээтэлин төрөппүттэригэр Иннокетий, Акулина Романовтарга “Мэҥэ кэскилэ” хамсааһын махтал суругун туттардылар.
2023 сыл түмүгүнэн ”Мэҥэ кэскилэ” оҕо-ыччат улуустааҕы хамсааһынын тэрийиигэ биллэр-көстөр үлэлээх оскуолаларга муниципальнай оройуон баһылыга Дмитрий Тихонов анал бириистэри туттарда.
Дьоҕус оскуолаларга (150 диэри оҕолоох) Дмитрий Таас аатынан Хорообут орто оскуолатын “Сардаҥа” оҕо түмсүүтэ бастыҥынан ааттанна. Иккис миэстэни Александр Пахомов аатынан Тиэлиги орто оскуолатын “Кэскил” оҕо түмсүүтэ ылла. Үһүс миэстэҕэ Е.П.Шестаков – Эрчимэн аатынан Бырама оскуолатын “Сардаҥа” түмсүүтэ таҕыста.
Улахан оскуолаларга (150 элбэх оҕолоох) Михаил Попов аатынан Аллараа Бэстээх орто оскуолатын “Школьная республика” оҕо түмсүүүтэ кыайыылааҕынан таҕыста. Алексей Шахурдин аатынан Төҥүлү орто оскуолатын “Өркөн” оҕо түмсүүтэ иккис буолла. Филипп Охлопков аатынан Майа орто оскуолатын “Феникс” оҕо түмсүүтэ үһүс миэстэҕэ тигистэ.
Наҕараадаламмыт үөрэнээччилэргэ, киэн туттар оҕолорбутугар эҕэрдэ, баҕа санаа бастыҥа ананна, салгыы ырыа-тойук аргыстаах сынньалаҥ киэһэтэ буолла. Күлүм уоттаах харыйалаах тэрээһини – оскуолатааҕы сылларын биир умнуллубат кэрэ түгэнин кинилэр мэлдьи өйдүү-саныы сылдьыахтара.
