Өрөспүүбүлүкэ үрдүнэн сылын аайы тэриллэн ыытыллар «Кыһын Саха сириттэн саҕаланар» бэстибээл чэрчитинэн Балыктаахха ахсынньы 1 күнүгэр Саҥа дьыллааҕы күөх харыйа уота күлүмүрдүү сандаарар үөрүүлээх түгэнэ буолан ааста.
Эрдэттэн бэйэ илиитинэн оҥоһуллубут оонньуурдары ким баҕалаах оҥорон аҕалан ыйыырга аахсыйа биллэриллибитэ. «Звёздочка» оҕо уһуйаанын үлэһиттэрэ, иитиллээччилэрэ, төрөппүттэрэ уонна орто оскуола үөрэнээччилэрэ, төрөппүттэрэ, нэһилиэк олохтоохторо ис сүрэхтэриттэн кыһаллан оҥорбут оонньуурдарынан, киэргэллэринэн лаглайбыт харыйабытын симээтилэр. Саҥа дьыл тыына барыбытыгар эрдэттэн билиннин, сүргэбитин көтөхтүн диэн Тымныы Кыһын оҕонньор сиэн кыыһа Хаарчааналыын харыйабыт уотун күлүмүрдэтэ оонньото, сандаарда тиийэн кэлбиттэрин бу тэрээһини көрө-кытта кэлбит нэһилиэк олохтоохторо, оҕо-аймах уруйдуу-айхаллыы, ытыс тыаһынан көрүстүлэр.
Бары бииргэ көхтөөхтүк күөх харыйа уотун уматан сандаартылар. Кэлэр сыл кэрэтэ үксээтин диэн бэйэтин алгыһын тиэрдэн туран Тымныы оҕонньор анаан-минээн аҕалбыт кэһиитин түҥэттэ.
Ахсынньы 31 күнүгэр саҥа 2025 сыл буолар түүнүгэр олохтоох култуура дьиэтигэр ыытыллар күрэхтэргэ көхтөөхтүк кыттаарыҥ диэн истиҥ санааларын тиэртилэр. Харыйа уота чаҕылыйа араас өҥүнэн оонньоон, кэлэн иһэр саҥа сыл тыынын тиэрдэн дьон-сэргэ сүргэтин көтөхтүн, кэрэҕэ-үтүөҕэ угуйдун, сырдык санааны сахтын.
Мария Захарова. Балыктаах
