Анисия Даниловна, Иннокентий Дмитриевич Скрябиннар 1973 сыл атырдьах ыйын 19 күнүгэр Балыктаах бөһүөлэгэр кэргэннии буолуу актатыгар 17-с нүөмэринэн саахсаланан ыал буолан аймахтарын-доҕотторун ыҥыран сыбаайбалаабыттара. Кинилэр үс сыл билсэн-доҕордоһон баран холбоспуттар эбит. Иннокентий Дмитриевич суоппар,Анисия Даниловна кулууп үлэһитэ идэни баһылаан Балыктаахха олохсуйан,39 сыл олорон,дьиэ туттан,сүөһү ииттэн дьон тэҥинэн үлэлээн-хамсаан,оҕолонон-сиэннэрдэнэн тыа ыалын сиэринэн быр-бааччы олороллор. Нэһилиэк общественнай үлэтигэр актыыбынайдык кыттан олоҕу кытта тэҥҥэ хардыылаан олох үөһүгэр олорон Анисия Даниловна 40 сыл Мэҥэ Хаҥалас улууһугар култуура эйгэтигэр, кэргэнэ Иннокентий Дмитриевич 23 сыл суоппарынан,17 сыл тыа хаһаайыстыбатыгар араас үлэҕэ үлэлээн билигин бочуоттаах сынньалаҥҥа олороллор. Сыралаах үлэлэрэ үрдүктүк сыаналанан Анисия Даниловна ССРС култууратын туйгуна, РФ култууратын бэтэрээнэ,Саха Республикатын култууратын үтүөлээх үлэһитэ,Саха Республикатын уонна Мэҥэ Хаҥалас улууһун араас сүһүөх тоҕус бэлиэ хаһаайката, Мэҥэ нэһилиэгин уонна Мэҥэ Хаҥалас улууһун бочуоттаах олохтооҕо,оттон Иннокентий Дмитриевич Саха Республикатын үлэ бэтэрээнэ,Мэҥэ Хаҥалас улууһун сопхуостарын тэриллиитин 50 сылынан бэлиэ хаһаайына,Саха Республикатын автотранспортнай министерство,Саха Сирин тыа хаһаайыстыбатын министерствотыттан элбэх грамоталарынан наҕараадаламмыта.
