Сэбиэскэй Сойуус Дьоруойа Ф.К.Попов аатынан Баатара агрохайысхалаах орто оскуолатыгар саҥа сүүрээн киллэрэннэр, «Рост» агролаборатория арыллан үлэлиир.
Ааспыт сыл балаҕан ыйыгар Уһук Илиҥҥи куонкурус эпэрээтэрэ «Саха сирин биир кэлим ресурснай киинин» пуондата ыытар «Кыах эйгэтэ» («Среда возможностей») диэн Тимченко пуондатын куонкуруһугар кыттыбыттара. Онно оскуола агробырайыага кыайыылаах тахсан грант ылан, бырайыак үлэҕэ киирбит.
Саха сиригэр үлэлиир «Экопиэрмэ» тэрилтэ айан таһаарбыт турба иһинэн гидропоникаҕа иҥэмтэлээх суурадаһынынан үүннэриллэр оҕуруот астарын тохсунньу ыйтан үүннэрэн саҕалаабыттар. Маны таһынан күөх үүнээйилэри – салааттары, укроптары эмиэ гидропоникаҕа олордон, оскуола остолобуойугар оҕолор номнуо сии сылдьаллар. Бу ыйга бастакы оҕурсуларын быһан сиэри кэтэһэллэр. Маннык айылҕаҕа буортута суох ньыманан аатырар агролаборатория улахан миэстэни ылбат, анал суурадаһынынан, уунан күөх үүнээйини сылы эргиччи үүннэрэр кыахтаах.
Агролабораторияны Баатара орто оскуолатын биологияҕа, химияҕа учуутала Дария Жиркова салайан үлэлэтэр. Кини маннык кэпсиир:
— Гидропоникаҕа буор туттуллубат буолан олус ыраас, аҥардас иҥэмтиэлээх суурадаһынынан, уунан үүнээйи үүнэр. Улахан миэстэни ылбат, хайдах баҕарар килиимэттээх сиргэ, элбэх оҕуруот аһын ылыахха сөп. Биһиги тымныы дойдубутугар, ахсынньыга сиэмэнэн ыһыллыбыт оҕурсулар номнуо ас кута тураллар. Биһиги бу дьарыкпыт сүрүн сыала – оҕолор үөрэтэр-чинчийэр үлэнэн дьарыктаныылара, саҥа агротехнологияны баһылаан, араас эспэримиэннэри оҥоруу буолар. Оҕолор бэйэлэрэ көрөн-харайан, бүөбэйдээн үүннэрбит буолан астыналлар, кэтэһэллэр. Үүннэрбит оҕуруот аспыт элбээтэҕинэ нэһилиэнньэҕэ атыыга таһаарар былааннаахпыт.
Оскуола иһигэр оҕолор оҕуруот аһын олордон, кыһыннары бэйэлэрэ үүннэрбит сибиэһэй оҕуруот астарын сии сылдьаллара холобур буолар. Оҕо кыра сааһыттан үлэҕэ сыстан, тыа хаһаайыстыбатын агрохайысхатыгар саҥа ньыма тобулан, саҥа саҕалаабыт бырайыактара ситиһиилээх буоллун.
