Олунньу 12 күнүгэр өрөспүүбүлүкэ Ситэриилээх былааһын иккис бөлөҕүн отчуота Баатара нэһилиэгиттэн саҕаланна.
Иккис хос бөлөҕү CӨ Бырамыысыланнаска уонна геологияҕа миниистирин бастакы солбуйааччы Михаил Кириллин салайар.
Баатара нэһилиэгин баһылыга Дмитрий Акимов 63 олохтооҕу мунньахха көхтөөх кыттыыны ылалларыгар ынырда. Отчуот өрөспүүбүлүкэ өрөгөй ырыатынан, өрөспүүбүлүкэ сайдыытын туһунан видеоролигынан саҕаланна. Олохтоохтор нэһилиэк сайдар кэскилин түстүүр ыйытыыларын биэрдилэр. Нэһилиэккэ гаас ситимин тардыллыыта, оҕо саадын саҥа дьиэтэ туттуллуута, кэтэх хаһаайыстыбаҕа көмө, оскуолаҕа сүрүн биридимиэккэ учуутал тиийбэтэ, суол-иис оҥоһуллуута, эдэр исписэлиистэри олохтуурга дьиэ суоҕа сүрүн ыйытыыларынан буоллулар.
Кэтэх хаһаайыстыба сайдарын туһугар туох эрэ бырагыраама ылылларыгар этиилэр киирдилэр. Оччоҕо сүөһү ахсаана аҕыйыа суоҕа. Урукку өттүгэр 8‒9 учуутал үлэлии кэлэр буоллаҕына, билигин олорор усулуобуйа суох буолан олох кэлбэт буолбуттарын бэлиэтээтилэр.
Василий Ходулов: «Дьокутаат диэн норуот кулута. Ил Түмэн 70 дьокутаата бөлөҕүнэн хайдыһан нэһилиэккэ тахсан дьону кытта кэпсэтиннэр. Онно олоҕуран сокуоннары таһаардыннар», ‒ диэн санаатын эттэ. Оскуола дириэктэрэ техническэй үөрэх салааларын элбэтэргэ, үс сыл орто үөрэхтээх математик куурустарын арыйдахха учуутал ахсаана элбииригэр эттэ. Сыымахтар Бырабыыталыстыба отчуотун биһирииллэрин биллэрдилэр.
Елизавета Неустроева.
