Олунньу 20 күнүгэр Аллара Бэстээх бөһүөлэгэр «Парус» успуорт уораҕайыгар Аҕа дойдуну көмүскээччилэр күннэригэр сөп түбэһиннэрэн “Эр бэрдэ» диэн ыччаттарга успуорт сахалыы көрүҥнэригэр күрэхтэһии ыытылынна.
Былырыын Арассыыйа «Росмолодежь-2023” граныгар Майа сэлиэнньэтин дьаһалтатын дьиэ кэргэн киинин салайааччыта Владилена Павлова хамаандатын кытта «Эн соҕотох буолбатаххын» диэн чөл олоҕу, успуорду көҕүлүүр сыаллаах социальнай бырайыагы бэлэмнээн кыайыылаах тахсыбыта. Ыччаты олоххо бэлэмнээн кини бэйэтигэр эрэллээх буолуутугар, ис кыаҕын, күүһүн тургутан көрөрүгэр үс-түөрт ый устата тохтоло суох үлэлээн кэлбит бырайыак чэрчитинэн тэриллибит «Эр бэрдэ» күрэхтэһии тэрээһиннээхтик ааста.
Күрэхтэһиигэ 18 ‒ 35 саастаах араас нэһилиэктэртэн уопсайа 50 ыччат түмсэн саха төрүт оонньууларын биэс көрүҥнэригэр ‒ үс төгүл үскэ, тутум эргииргэ, мас тардыһыытыгар, сүүрүүгэ, хапсаҕайга күөн көрүстүлэр.
Бэрт эрийсиилээхтик ааспыт тыҥааһыннаах күрэхтэһии түмүгүнэн муҥутуур кыайыылааҕынан Нөөрүктээйиттэн Арсен Федоров ааттанна. Аллараа Бэстээхтэн Николай Осипов иккис, Төхтүртэн Артур Кулаковскай үһүс миэстэлэри үллэһиннилэр. Кыайыылаахтар сыаналаах бириистэринэн наҕараадаланнылар.
Бырайыак үлэтэ салҕанан барар.
Елизавета НЕУСТРОЕВА.
