Балаҕан ыйын 10 күнүгэр быыбарга кыттыы саамай быһаарыылаах чаастарыгар 257 №-дээх Арҕаа Майатааҕы быыбардыыр учаастакка дьон-сэргэ куоластааһына көхтөөх.
Күн ортото олохтоохтортон 44 бырыһыаннара куоластаатылар. 70-тан тахса киһи сайаапканан дьиэлэригэр куоластаан өрөспүүбүлүкэбит сайдыытыгар кыттыһалларын биллэрдилэр. Кинилэртэн саамай аҕа саастаах ытык кырдьаҕас, 99 сааһыгар сыдьар Варвара Петровна Трофимова буолла.
Хамыыһыйа үлэһиттэрэ быыбар үс күн устата ыытыллыбытын биһирииллэрин биллэрэллэр. Үлэлиир-хамсыыр, кэлэр-барар дьоҥҥо табыгастааҕын бэлиэтииллэр. Бастакы күҥҥэ 400 киһи быыбардыы кэлбит. Үһүс күҥҥэ эдэр быыбардааччылартан Сайыына Маркова уонна Сайаана Андреева куоластаан бардылар. Сайыына быйыл мединститут устудьуона буолбут, Сайаана АГИКИ иккис кууруска үөрэнэр.
