Алтан нэһилиэгэр ахсынньы 5-6 күннэригэр саха балаҕаныгар успуорт инструктора Гаврил Элестофорович Попов көҕүлээһининэн нэһилиэккэ чөл, доруобай олоҕу тарҕатар сыаллаах түөлбэлэр икки ардыларыгар остуол оонньууларыгар күрэхтэһии тэриллэн ыытылынна. Дуобакка, саахымакка, хаамыскаҕа, хабылыкка күрэхтэһии нэһилиэккэ үгүстүк ыытыллар. Манна олохтоохтор, өрүү буоларын курдук, көхтөөхтүк кыттан бастыҥнарын быһаардылар.
Эрийсиилээх киирсиилэр түмүктэринэн кыайыылаахтар ааттаннылар. Саахымакка иккис дуоскаҕа «Кыламан» түөлбэттэн Иван Алексеевич Местников бастаата, «Түөтэй» түөлбэттэн Евгений Николаевич Петров 2-с миэстэ буолла. Бастакы дуоскаҕа кэрэ аҥардарга «Кыламантан» 1-кы миэстэ Татьяна Петровна Стручкова, 2-с миэстэ «Төлөнтөн» Сардана Спиридоновна Иванова буоллулар. Бастакы дуоскаҕа «Түөтэй» түөлбэттэн Гаврил Егорович Попов 1-кы, «Кыламантан» Владимир Егорович Билюкин 2-с, «Төлөнтөн» Степан Степанович Посельскай 3-с миэстэни үллэһиннилэр.
Хабылыкка, хаамыскаҕа эр дьоҥҥо Семен Николаевич Сидоров бастакы миэстэни ылла, «Түөтэйтэн» Влас Николаевич Петров 2-с, Афанасий Николаевич Семенов (Төлөн) 3-с миэстэни хааччыннылар. Кэрэ аҥардарга бастакы миэстэни «Кыламантан» Зинаида Романовна Сектяева ылла, иккискэ Августа Афанасьевна Петрова тигистэ, үсүһү Ольга Ефремовна Гаврильева хааччынна уонна төрдүс Майя Владимировна Билюкина, бэһис Елизавета Егоровна Мальцева буоллулар.
Дуобакка иккис дуоскаҕа 1-кы миэстэни Николай Николаевич Платонов (Түөтэй), 2-с миэстэни Андрей Иванович Слепцов (Төлөн) уонна 3-с миэстэни Михаил Анатольевич Сектяев (Кыламан) үллэһиннилэр. Кэрэ аҥардарга 1-кы миэстэни Мотрена Николаевна Билюкина, 2-с миэстэни Любовь Егоровна Попова, 3-һү Татьяна Васильевна Шамодина ыллылар.
Сарсыныгар орто оскуола успуордун саалыгар түөлбэнэн хапсаҕайга үс ыйааһыҥҥа, ох саанан ытыыга уонна сыал ытыытыгар күрэхтэһиилэр буоллулар. Онно олохтоохтор көхтөөхтүк кыттаннар, кыайыылаахтар мэтээллэринэн, грамоталарынан наҕараадаланнылар.
Ыытыллар тэрээһиннэргэ мэлдьи күүс-көмө буолар олохтоох кулууп үлэһиттэригэр Татьяна Аркадьевна, Поликарп Романович Билюкиннарга Гаврил Элестофорович тапталлаах «Эркээйи» хаһыатын нөҥүө махталын тиэрдэр.
Марелла Баишева.
