Олунньу 16 күнүгэр улуус киинин Аллараа Бэстээх бөһүөлэгин олохтоохторун кытта көрсүһүүнэн Мэҥэ Хаҥалас улууһугар Саха Өрөспүүбүлүкэтин бырабыыталыстыбатын отчуота түмүктэннэ.
Мунньаҕы Аллараа Бэстээх бөһүөлэгин баһылыга Юрий Колмаков киирии тылынан аста. Улуус баһылыга Дмитрий Тихонов отчуоттуур бөлөх састаабын билиһиннэрдэ.
Бүһүөлэк култууратын дьиэтигэр 141 олохтоох мустан, бырабыыталыстыба бөлөҕүн салайааччы, СӨ экэниэмикэҕэ миниистирэ, улуус кураатара Петр Попов салалта ааспыт сыллааҕы үлэтин отчуотун иһиттилэр, хас биирдии долгутар ыйытыыларыгар туһааннаах министиэристибэлэр, биэдэмистибэлэр эппиэттээх үлэһиттэрин хоруйдарын ыллылар, туруорсууларын этиннилэр.
Улуус киинин олохтоохторо Өлүөнэ өрүһү туоруур муоста тутуутун үбүлээһинин, бөһүөлэк улаатан, нэһилиэнньэтэ эбиллэн иһэринэн саҥа оскуола, оҕо уһуйаана хаһан тутулларын, уматык сыаната үрдээһинин тохтотууга туох үлэ барарын, хомунаалынай өҥөлөр тарыыптара үрдээһинин ким хонтуруоллуурун, доруобуйаларынан хааччахтаах дьону дьиэнэн хааччыйыыга ханнык бырагыраамалар баалларын, уот ситимнэрэ эргэрбитин, о.д.а.кыһалҕаларын чопчуластылар.
Елизавета Яковлева Подгорнай, Запроточнай уулуссаларга олорор 30 ыалга гаас ситимэ тардыллыытын туруорсубуттара өр сыл буолбутун, кыһалҕалара быһаарылла илигин эттэ. «Коммунтеплосервис» тэрилтэ үлэһитэ Анатолий Егоров толору хааччыллыылаах дьиэ элбээн иһэринэн, туттуллубут убаҕаһы ыраастыыр ыстаансыйа кыаҕын үрдэтэр наадатын ыйда.
Олохтоох бүддьүөт дохуоттуур чааһын үрдэтиигэ үлэ, айылҕа гааһын убатар собуот кыаҕын туһаныыны кэҥэтии, каадыры олохсутууга биэдэмистибэ дьиэ ыларыгар үбүлээһини көрүү боппуруостарын туһунан итиэннэ нэһилиэнньэ иннигэр былаас отчуоттуур тэрээһинин аатын уонна көрүҥүн инникитин уларытар туһунан Альберт Егоров эттэ.
Доруобуйа харыстабылыгар сыһыаннаах этиилэр киирдилэр: дьоҥҥо олус туһалаах “Абалаах” балыыһаҕа анаан саҥа дьиэни тутууну биитэр бэс чагдаҕа турар урукку «Сосновка» сонотуоруй баазатыгар олохтууру, быраастарынан хааччыллыы итэҕэһиттэн төлөбүрдээх өҥөнөн туһанарга күһэллэллэрин туһунан иһитиннэрдилэр.
Өрүскэ күһүҥҥү, сааскы хаайтарыы кэмигэр салгын олбохтоох суудуналар тарыыптарын аһары үрдэтэллэрин туһунан этиигэ Илин эҥэр улуустар кыттыһан маннык ааллары атыылаһыыга үлэни ыытан эрэллэрин туһунан хоруйдаатылар.
Саахалланар турукка киирбитэ ырааппыт 2-с нүөмэрдээх оскуолаҕа уонна ирдэбилгэ эппиэттээбэт усулуобуйаҕа үлэлиир оҕо уһуйааныгар анаан саҥа тутуулары өссө төгүл оскуола төрөппүт кэмититэтин аатыттан Ольга Филиппова уонна “Солнышко” оҕо саадын сэбиэдиссэйэ Ольга Дьяконова туруорустулар. Улуус киинигэр эппиэттиир почта дьиэтэ суоҕа эмиэ этилиннэ.
Түмүккэ отчуоттуур бөлөх салайааччыта Петр Попов олохтоохторго көхтөөх кыттыыларын иһин махтанна, мунньахха киирбит этиилэр бары боротокуолга киирэн, салгыы үлэҕэ ылыллалларын туһунан иһитиннэрдэ. Барыларыгар бигэ туруктаах олоҕу, кытаанах доруобуйаны, этэҥҥэ буолууну баҕарда.
Февронья ОХЛОПКОВА.
