Аймаҕынан – айылҕаҕа, алааһы күрүөлүү

Аҕыс ыйдаах уһун кыстыгы этэҥҥэ туораан тыа сирин дьоно сайыҥҥы түбүккэ түстэ. Төҥүлү Бэрдьигэстээҕэр олорор, үлэлиир Артем Борисов бааһынай хаһаайыстыбатыгар үлэ бары хайысханан эрчимнээхтик барар.

Арассыыйаҕа Дьиэ кэргэн, Саха Өрөспүүбүлүкэтигэр Оҕо саас сылынан аймахтары сомоҕолуур биир үчүгэй тэрээһин буолла. Ыам ыйын 18 күнүгэр – Ньургуһун күнүгэр Хаатаан диэн 9 гектардаах алаас күрүөтэ  эргэрэн суулла турар буолбутун саҥарда таарыйа, оҕону-ыччаты айылҕаҕа таһааран бэйэ-бэйэлэригэр чугаһатан, алааска сүүрдэн-көтүтэн, оонньотор, аймахтары сомоҕолуур сыаллаах Артем Иванович чугас хаан-уруу дьонун субуотунньукка муста. Манна өрөбүлү туһанан Майаттан, Хараттан, Табаҕаттан, Тиэлигиттэн, Төҥүлүттэн аймахтар кэлэннэр, үлэ күөстүү оргуйда. Кыһын дьиэҕэ хаайтаран олорбут оҕо-аймах ыраас салгыҥҥа астына-дуоһуйа оонньоото. Күүстээх аҥардар алааһы эргиччи сиэрдийэлэрин саҥардан күрүөнү абырахтаатылар. Кэрэ аҥардар баай астаах сандалы бэлэмнээһинигэр саба түстүлэр, быыстарыгар тэлиэгэҕэ сайынын отторго диэн алаас эргэ күрүөтүн маһын тиэйдилэр.

Хаатаан диэн алаас өрөспүүбүлүкэҕэ киэҥник биллэр урбаанньыт Иван Борисов өлбүгэ сирэ буолар. Маны Артем Борисов эттэһэн оттообута хаһыс да сыла. Субуотунньук буоларын истэн Иван Иванович кэргэниниин Мария Васильевналыын алаастарын көрө кэлэн бардылар. Саха киһитин үтүө үгэһинэн бу күн урбаанньыт Иван Иванович Артем Борисовка сылгыларыгар 5 куул эбиэс бурдук кэһиилээх кэлэн барыбыт үөрүүтэ үрдээтэ. Дьоммут маннык бэйэ-бэйэлэрин үлэҕэ-хамнаска өйөһөн көмөлөсүһэ олороллоро олус хайҕаллаах.

Сайыны көрсө биир былдьаһыктаах күн туһалаахтык ааспытыгар бырааппытыгар, убайбытыгар Артем Борисовка махтанабыт, үлэтигэр-хамнаһыгар ситиһиилэри, этэҥҥэ буолууну баҕарабыт.

 

Марелла Баишева.