Мэҥэ Хаҥалас дьоно-сэргэтэ анал байыаннай дьайыыга сылдьар биир дойдулаахтарбытыгар, кинилэр чугас дьонноругар тиһигин быспакка көмөлөһөллөр.
Мария Лукина салайааччылаах «Түмэн» уопсастыбаннай киин волонтердарын көҕүлээһининэн от ыйын 3-5 күннэригэр «Балык» аахсыйа тэрилиннэ. Аахсыйа иитинэн нэһилиэнньэттэн сибиэһэй собо хомуйан, ууга суураллан иһиллэр миин оҥорон ыытарга бэлэмнээтилэр.
Нэһилиэктэргэ бэтэрээннэр сэбиэттэрэ көмөлөһөннөр, биирдиилээн да дьон аҕаланнар, син балачча балык кэллэ. Сорох дьон бэйэлэрэ ыраастаан, үөстээн ыыттылар. Кэлбит собону ыраастаан бэлэмнээһиҥҥэ «Түмэн» сыаҕын иистэнньэҥнэрэ, оскуоланы 1983 с. бүтэрбиттэр түмсүүлэрэ сүрүн күүс буоллулар.
«Аахсыйа туһунан биллэриини истээт, биир бастакынан Лоомтукаттан Николай Игнатьев бэйэтэ илимнээн 2 биэдэрэ собону аҕалан биэрбитэ, өссө Быраматтан байыаннай дьайыыга сылдьар оҕолоох ийэ барахсан аҕалбыта», — диэн сыах салайааччыта Федора Наумова бэлиэтээн эттэ.
Бу ыраастаммыт балыгы Екатерина Романова сэбиэдиссэйдээх «Кэнчээри» уһуйаан үлэһиттэрэ духуопкаҕа хатаран, эрийтэрэн бытарыттылар. Ол кэннэ Маргарита Максимова бэрэссэдээтэллээх улуус бэтэрээннэрин сэбиэтин салалтатынан лааҕыр оҕолоро пергамент кумааҕыттан анал бакыаттары оҥороллор. Онно «Майаттан, Түмэнтэн» диэн суруктааннар, биир бакыакка үс остолобуой ньуоска бытарытыллыбыт собону куталлар. Маны биир ыстакаан итии ууга куттахха бэртээхэй хойуу балык миинэ буолар.
Ааспыкка итинник оҥорон ыыппыт балыктарын оҕолорбут «туттубут, миин оҥорон истибит, үчүгэй» диэн махталларын ыыппыттара.
Бу аахсыйаҕа кыттыбыт Мэҥэ Хаҥалас олохтоохторугар бука барыларыгар «Түмэн» уопсастыбаннай киин сүбэтин аатыттан барҕа махталларын тиэрдэллэр.
Төрөөбүт дойдуларын аһа, ахтар-суохтуур соболорун миинэ уолаттарбытыгар сэниэ-күүс эбиэхтин! Бары этэҥҥэ, кыайыы көтөллөөх эргиллэн кэллиннэр!
Биһиги кэр.