Улууспутугар Аллараа Бэстээххэ «Парус» успуорт уораҕайыгар Учуутал уонна настаабынньык сылын түмүктүүр уонна Үөрэхтээһин сайдыытын 150 сылыгар аналлаах тэрээһин ыытылынна.
Киэҥ сааланы тобус-толору нэһилиэктэр быыстапкалара туруорулунна. Быыстапкаҕа нэһилиэккэ үөрэхтээһин сайдыытын көрдөрөр араас интэриэһинэй оҥоһуулаах истиэндэлэр, оҥоһуктар турдулар.
Хорообут орто оскуолатын быыстапкатын Наталья Евсеева эскизтээн, бэрт сэргэх, кэлбит дьон интэриэһин тарта. Элбэх сонун санааны ыллыбыт диэн махталларын тиэртилэр. Оскуола устуоруйатын, учууталлар, киэн туттар выпускниктарбыт тустарынан матырыйааллары хасыһан, үөрэтэн учууталларбыт истиэндэ оҥоһуллуутугар күүс-көмө буоллулар. Ыалдьыттарга быыстапканы Евгения Сосина, Ирина Сергучева билиһиннэрэн, кэпсээн истилэр. Сандаара Сергучева оҥорбут видеороликтарын сэргээн көрдүлэр. Оскуолаларбыт макеттара оҥоһуллан сэргэх көстүүнү биэрдэ.
Кэлбит ыалдьыттар, о.э. Хорообут оскуолатын бүтэрбит, үлэлээбит үөрэнээччилэрбититтэн оскуола кэмнэрин санатан боппуруостары биэртэлээтим. Макеты көрөн ханнык кабинекка үөрэммиттэрин, учууталларын туһунан, альбомҥа бэйэлэрин хаартыскаларын көрөн үөрэллэрэ, көрүөххэ үчүгэй. Куораттан кэлбит ыалдьыттарбыт оскуолалар туруорбут быыстапкаларын көрөн сөхпүттэрин эттилэр.
Быыстапка кэннэ үөрүүлээх чаас, сыл түмүгүнэн этиилэр, санаалар салҕаннылар, наҕараадалар туттарылыннылар.
Эҕэрдэ нүөмэрдэргэ оҕо төрөппүтүнээн, үөрэнээччи, төрөппүт, учуутал бары хуорунан ыллаабыттара сэргэх буолла. Өссө дириэктэрдэр, оҕо саадын сэбиэдиссэйдэрэ хуорунан, буруолуу сылдьар саҥа ырыаны «Учуутал гиимнин» ньиргиппиттэрэ истиэххэ, көрүөххэ үчүгэй.
Тэрийбит салайааччыларбытыгар махтал тылларын аныыбыт, өссө да интэриэһинэй сүүрээннэр киирэ турдуннар.
Октябрина Васильева.
