Алтынньы 10 күнүгэр Владимир Петрович Ларионов аатынан Майа орто оскуолатыгар ураты, таһаарыылаах күн буолла. Оскуолабыт дириэктэрин эбээһинэһин толорооччу Павел Васильевич Васильев оскуола үөрэнээччилэрин кытта көрсүһүү тэрийдэ. Көрсүһүү «төгүрүк остуол» быһыытынан барда. Кинини кытта дириэктэри иитэр үлэҕэ солбуйааччы Маргарита Климентьевна Афанасьева уонна оскуола быйылгы үөрэх дьылын лиидэрэ Бурнашева Люба сүбэ мунньахха үөрэнээччилэр ыйытыктарыгар хоруйдаатылар.
Бу тэрээһиҥҥэ муһуннулар: орто сүһүөх “СМиД” уонна улахан сүһүөх “Түмэн” оҕо түмсүүтүн актыбыыстара. Ону тэҥэ, хас биирдии кылаастан 2 актыыбынай оҕо төгүрүк остуолга кыттыыны ылла. Үөрэнээччилэр сүрүннээн маннык боппуруостарга тохтоотулар, ыйыттылар:
1) биир күн көҥүл таҥнан сылдьыы;
2) таҥас-сап уларытар миэстэ;
3) остолобуой итии аһа, иһэр уу;
5) киберуспуорт 7-11 кылаастарга диэри буоларын ситиһии;
6) таҥас уларытар хостор, кылаастар уонна туалет өрөмүөнэ, миэбэллэри саҥардыы;
7) оскуола саҥа лиидэрин Бурнашева Люба бырагырааматыгар киирбит тэрээһиннэри оскуола былааныгар киллэрии уо.д.а.
Үөрэнээччилэр бэйэлэрин санааларын аһаҕастык эттилэр, сөптөөх хоруйу ылан астыннылар. Бу көрсүһүү кэнниттэн салалта, үөрэнээччилэр быйылгы үөрэх дьылыгар тэҥҥэ таһаарыылаахтык, айымньыылаахтык үлэлииргэ сыал-сорук туруордулар.
Аринкин Артем, «Мэҥэбил» пресс-киин кэрэспэдьиэнэ
