Н.Д.Неустроев аатынан Бэдьимэ орто оскуолатыгар Билии Күнэ «Точка роста» кабинеттарын аһыы үөрүүлээх чааһыттан саҕаланна. Биология, химия уонна физика кабинеттарын оҕону сайыннарар аныгылыы саҥа оборудованиелары, лабораториялары уо.д.а. оҕолор олус сэргээтилэр.
Быйыл оскуолаҕа 7 оҕо киирдэ. Оҕолору эдэр педагог Ефимова Анастасия Гаврильевна ылла.
Үөрэх кыһатын боруогун аан бастаан атыылаан киирбит оҕолору ис сүрэхтэриттэн нэһилиэкпит куратора, улуустааҕы баай-дуол уонна сир комитетын начальнига Дмитрий Аргунов, үөрэх управлениетын сүрүн специалиһа Февронья Плотникова, нэһилиэк баһылыга Пётр Андросов, дириэктэр Владислав Иванов эҕэрдэлээтилэр.
Билии күнүн 1968 с. оскуола бастакы выпустара киэргэттилэр. Кинилэр дьоһуннаах кэпсээннэрин баар дьон болҕойон иһиттилэр, киэн тутуннулар. Выпустар үөрэммит кыһаларыгар балаҕан-мусуой ситэригэр оскуоланы бүтэрбиттэрэ 55 сылынан 55000 солк. бэлэх ууннулар, бэйэлэрин патриоттуу тыыннарын оҕолорго биллэрдилэр.
Маны таһынан выпустар үбүнэн көмөлөһөн 7 кылаастары кытта шефтэһэн дойдуларыгар тапталы көрдөрөр бэлиэни үөрүүлээхтик астылар. Выпуск лидерэ, ытык сүбэ бэрэссэдээтэлэ Михаил Попов эҕэрдэ тылы этэн аалай лентаны оҕолор уонна выпускниктар быстылар. Бэлиэ оҥоһуллан турарыгар улахан көмөнү төрөппүттэр оҥордулар диэн бэлиэтээн эттэ.
Сайыҥҥы сынньалаҥы үлэлээн олус туһалаахтык атаарар, 260 туонна оту оттоспут 11 кылаас үөрэнээччилэригэр Алёша Андреевка уонна Артём Готовцевка ИП Емельянов ММ анал бириэмийэтин туттарда, үлэ киһини киэргэтэрин өйдөттө. Бырааһынньыгы 9кылаас уолаттара күпсүүргэ оонньоон киэргэттилэр.
Оҕолору оскуола лидерэ Иванна Захарова эҕэрдэлээтэ уонна саҥа киирбит оҕолорго «Навигаторы детства» самолётиктарын бэлэхтээтилэр.
Билии күнүн «Дьөһүөл» бырайыак девиһинэн түмүктээтибит: бэдьимэлэр үрдүккэ, бэдьимэлэр сырдыкка, дойдубут туһугар бары бииргэ!!!
Екатерина Попова. Бэдьимэ
