Балаҕан ыйын 13 күнүгэр Томторго үгэскэ кубулуйбут күһүҥҥү дьаарбаҥка үс тэрилтэ: кулууп, оскуола, уһуйаан кыттыһыылаах ыытылынна. Бары үөрэ-көтө нэһилиэк успуорт былаһааккатыгар мустан, остуол тардан, атыы-тутуу арааһа тэрилиннэ.
Уһуйаан оҕолоро саҕаланыытыгар ырыаларынан, хоһооннорунан эҕэрдэлээтилэр. Кылаастарынан, тэрилтэлэринэн остуолу киэргэтии, күһүн бэлэҕэ ‒ сиэдэрэй бүлүүдэ, биирдиилээн «Чудо-юдо», «Гиганнар» куонкурустара ыытылынна. «Күһүҥҥү киһи күлбүтүнэн» лотерея оонньонно. Оҕолор учууталларынаан, ийэлэр, эбэлэр бары бэркэ кыһаллан бэлэмнэммиттэрэ, сайын устата оҕуруот аһын арааһын олордубуттара көһүннэ. Биллэн турар, манна дьиэ кэргэттэр бары үлэлээн-хамсаан, түбүгүрэн, оҕолорбут эмиэ туора турбакка сайыны быһа сыыс от үргээн, уу кутан үтүө түмүгү ылаллара биллэр суол.
Быйыл саас уһуйаан, оскуола оҕолоро бэйэлэрэ бүөбэйдээн олордубут арассаадаларын нэһилиэнньэҕэ атыылаабыттара, ону көрөн-истэн, улаатыннаран түмүгүн көрөн үөрдүлэр, астыннылар.
Прасковья Местникова
